China linük naklu ken mezüngmeshirtem tepuokdak ayutsü

Beijing, November 4 (Agencies): China linük naklu ken mezüngmeshirtem küm asem tashi tepuokdak ayutsü ta tanü ozüng takang ka yangluogo.
China indang criminal law nung temelenshiji National People’s Congress (NPC) indang committee senden ka nung agizük, ta osang ka ajanga ashi.
“Yimjak nung linük naklu ken mezüngmeshiba atema yimten temeten magütsütsü, tepuokdak ayutsü aser ibaji küm asem tashi ayutsü akok” ta ozüng tasenba nungji lateta lir.
China-i par naklu ken atentsü atema telatetba aika yanglua lir aser tawa tu iba ken ya party, kiyimba sentong aser asüpila sentongtem nung matentsü atema ozüng kar yanglushia liasü.
Taküm September ita parnoki National Anthem Law yangluba nung linük nung sensotemi ken mezüngmeshira, anogo 15 ayutsü ta lateta liasü.