China nung ketdangsertemi Khristan reju ka shibangtsü

Shangqiu/Henan, September 20 (Agencies): China kübok Henan province nung ketdangsertemi Khristantemi lapokba reju ka shibangtsüogo.
Iba reju nung tanurtem dang yimya aser wainshin tajungtem sayu saka parnoki tamangba yimsü dak sendakba tesayuba agütsüba atema shibangtsü, ta ChinaAid-i metetdaktsü.
Khristan tsür Ms. Zhu-i ashiba agi, September 14 nü national security ketdangsertem July ita lar kidangi aru aser kakettem kar bener ao.
Lar reju nung theology class tem atema amshiba kakettem ketdangsertemi bener ao. Parnokisa computer dena arogo indang osettsüsettem kar bener ao aser rejuji shibangtsü.
China nung tanurtem dang tamangba yimsü tesayuba agütsüba tenokdangba yamai agütsür. Ajisüaka, Chinese Constitution nungbo sensotem tamangba yimsü temeden agüja lir.
Sorkari amokmerenaka, China nunger taintemi parnok tanurtem sentepi aser Khristan tamangba dak sendakba sentongtemi anir aoer.
Iba jagi ketdangsertemi Regulations on Religious Affairs meyipa reprangshiogo aser ibaji sangküm February ita nungi mapa küma tenzüktsü.

You must be logged in to post a comment Login