China Open final Axelsen aser Chen Long na asayatsü

Shanghai, November 18 (Agencies): Denmark nunger asayar World number one Viktor Axelsen China Open final nung Olympic champion Chen Long den Deobarnü asayatsü. Kasa mapang nung tetsür kicha asaya nung Japan tsür Akane Yamaguchi aser China tsür Gao Fangjie na asayatsü. Gao Fangjie-i tang tashi nung khen danga Superseries asaya nung mezüngbuba round atena asayaa mali.
Arishi küm 23 tain Axelsen shibai tawa world championship kokogo, pai semifinal asaya nung Hong Kong nunger asayar Angus Ng Ka-long 21-12, 21-17 agi kokogo. Honibarnü tena semifinal asaya minute 39 asayaa liasü.
Kasa mapang nung tebur kicha semifinal asaya tanga ka nung Chen-i Korea nunger asayar Son Wan-Ho 21-17, 10-21, 21-7 agi kokogo. Tena minute 71 asayaa liasü.
Tang tashi tena tsüngda asayaa aruba nung arishi küm 28 tain Chen-i, Axelsen tenetben koka lir aser khen dang tamakok angu, aser iba ajanga pa asoshi maongka tajungba asütsü ta bilemer.
Kasa asayamung tetsür kicha asaya nung arishi küm 19 tain Gao-i Spain tsür Olympic champion Carolina Marin 21-19, 21-19 agi kokogo. tena tsüngda asaya ghonda ka asayaa liasü.
Maneni Gao den final nung asayatsü alila Japan tsür Yamaguchi-i Thailand tsür Ratchanok Intanon 21-14, 21-18 agi kokogo.

You must be logged in to post a comment Login