China Open nung Srikanth masayatsü

New Delhi, November 11 (Agencies): India nunger nüngtugu badminton asayar Kidambi Srikanth China Open Superseries nung timtem tilaka aliba ajanga masayatsü, saka pa hopta ka shi anisüngzüker Hong Kong Super Series nung asayatsü, kong pa World No.1 akümtsü asoshi maongka lir.
Srikanth shiba tang tebur asayartem rongnung jenjang tanabuba nung lir, pa Senior National Badminton Championships asayaba mapang nung tetsüng yiruba sülen hopta ka anisüngzüka alitsü asoshi telemtetba agiogo. “Ni China Open (November 14-19) nung shilem magitsü. Kü tetsüng nung tetsü tera yirua lir aser doctor temi hopta ka anisüngzüka alitsü asoshi tetuyuba agütsüogo. Iba ya Nationals asayaba mapang nung yiru, saka ni maneni asayaba ajanga tera tamajungba kümogo. Ajisüaka hopta ka tsüngda nungbo ni jungadoktsü,” ta Srikanth-i osangbenertem dang ashi.
Badminton Association of India (BAI) puri ashiba agi, Srikanth Nationals asayamung mapang yiruba ya coincidence ka dang lir koba asoshi anogotem linük nung jenjang temaba nung asayartem den asüngdangteper yanglu.
“Pa yiruba ya Nationals dak atongtsü nüngdak madoker, ta bilemer aser iba ya mapang meshidak ka nung lir. Iba asayamung atema anogotem linük nung jenjang temaba nung aliba asayartem den asüngdangteper latet. Parnok Nationals nung shilem magira Macau Open nung asayar lila,” ta BAI secretary general Anup Narang-i ashi.
“Tanga asayartem shinga tashi agi meyiru. Srikanth tetsüng tera yirua lir, koba hopta tsüngda nung ajungadoktsü. Anungji pa Hong Kong nungang asayatsü kong pa temaba jenjang tongtettsü asoshi maongka lir,” ta paisa ashi.
Srikanth shiba National Championship final nung HS Prannoy-i tsükdaktsü, Pa October 18 nungi tenzüker khena maneni badminton asaya arudar.