Chiyongtsü tajung chiang

Asenok asoshi anema alitsü atema achiajem nung kümdangtsüba ya tanü putu nungsa tongtibangtiba kümogo. Asenoki kanga junga metettsüba kaji asenoki anogo shia bazaar nung alia achiba chiyongtsütem ya mozü agi indaktsüba chiyongtsütem lir. Atangji, aonsutsü, süngjanglijang aser shiururutem dena yakta aientsü aser tulu akümtsü asoshi mozü agütsür, kechiyong alima nung nütsüng züinba ya onsara nungji mozü mamshii alu ayimba agi aser mozü mechidaktsüi shiruru metsüba agi meperidaktsütetter. Ibayongji, dokan nung aliba jang, metsü mersü, süngjanglijang aser shi ango ajak ya mozü agüja züsentetba aser metsütetbatem lir. Ano, temang asoshi talila tamajung kaji, alu ayimdang aser shiruru metsüdang amshiba mozü dang masü saka chiyongtsü tamajung makümtsü asoshi alu nungi bener adoker külena jang, aonsotsü aser süngjanglijang nung mozü tzü araker. Ibayongji, talisa aonsutsü aser süngjanglijang hopta junga yuaka tang yatali mesüra ongzükli amaidang nennena mesüra sentsü ajak adoka meremmerema alibaji mozü tzü agi nendaktsür aser meremdaktsür. Ano, shi nunga temo alitsü aser seret adokdaktsütsü asoshi mozü jem tuloktsür aser ango-a anogo aika yuaka tamajung makümtsü asoshi rejep nung ayuba den külemi  mozü dena tutsür. Itemji asenoki jungjunga bilemdangra  anogo shia asenoki bazaar nung aonsutsü, süngjanglijang aser shi ango tajung tajung shima aliba chiyongtsütem ajak mozü agi sünga lir. Asenok asoshibo akhidang otsüla oboula nunger mapangtem nungi chiyongtsü tajung shima achitsü asoshi science tesayuba ka lir, ibaji aonsutsü aser süngolemba koba nung shirurui achiba bangmong mesüra tarak mali, itemjibo meimchir asoshi miim aketba chiyongtsü tamajung ta takzü, anungji machir. Ajisüaka, tanübo asenokibo bazzar nung tarak khenyongi maket tang ongzükli aser yatali amato sentsü lashia aliba aonsutsü aser süngjanglijang dang shimashima achir. Item ajakji asenok asoshibo sen tasak agi miim alia achir asütsü. Iba jagi, asenok aika dak meimlaika tashidak tamajung agi atonger aser item tashidakji asenoki aiben tsürabur temenen aser atakatem nungi aruba tashidaktem amato bilemer. Aji oda, tashidak tulu agi metongaka, asenok aika temang tulu akümba ya shi aser ango nung mozü aliba chisemba ajanga adokba teimba asütsü. Ano, tanü asüng shisabolutsü kaji shishilembadak nübortem ashioktsütsüsa aikati inyaker. Iba jagi, plastic antsü, plastic jang aser plastic ango dena ayoker aser itemji asenoki memeteti chiadoker. Itemji dang masü saka ano asenok dokan nung mamatzü powder alia ajemba nung ya temang asoshi tajangzük angutsüba dang nungibo timtemang tali angutsüsa enoka yanglur. Ibayongji, asenoki süngo yangludang tendangra, shini (sugar) meinokyonga mamatzü powder kisüng aiyer ajem nung tanang asütsü. Tetezü mamatzü powder nungji mamatzü dang masü saka shini dena aika enoka lir, kechiyong shini kisüng ayok nungbo seret nung sen 20 dang asütsü saka mamatzü powder nung enoker ayok nungbo seret nung sen noklang tema asütsü. Iba amaji tayokertem tajangzük bushidang asenok talirtem tashidak menar. Item ama asenoksasa asen sen agi tashidak alia timtemtsüba tia nungi kümzüktsü asoshi asenok kibong shiai pei peri aonsutsübosa züsentettsüsa alu mesüra atsü tilakabosa alitsüla. Ano akok tashi pei peribosa arotsüsa tsük lua ayimtsüla. Aji oda, dokan nung mamatzü powder alia ajemtsü melen mamatsü tajung yimzüka ajemtsü asoshi asenok kibong shiai nabong kaka anana danga metsütetra, iba jagi asenok temang anema alitsüba nung tuluka yaritsü. Mozü mamshii pei peri züsenteta chiyongtsü atema alu tilala ayimba aser an, ak aser nabong metsüba agi senotsü kümzükba dang nungibo ano tashidak nungi kümzüka alibajiang jenjang tuluba asütsü. Asenoki sen dang bushir bazaar nung terenem chiyongtsü alia achibaji dang dalangba aser jangratemtsü taketba amai bilemer, saka kodang asenoki item tajangzük aser takoksatemji meteta asensasa aseni züsentetba aser metsütetba chiyongtsü achi tenzükdir, iba taküm aser mapangjisa jangratatemba asütsü. Iba jagi asen dang masü saka asen dak nungi aser asen chirnurtem dak nungi jakzükba semchirsemnurtem asenok dang nungi aso tajungba sotettsü aser tekolok techiraba asütsü.