Churachandpur district nung ghonda 60 mokdanger

Imphal, September 8 (Agencies) : Manipur Assembly nung August 31, 2015 nü lisopur kümzüka ayutsü dak sendakba bill asem agizükba anema Churachandpur district nung Mongulbar nungi ghonda 60 mokdangtsü tenzükogo.
Iba sentong ya Joint Action Committee (JAC) ajanga tanü anüngdang 12:00 ako nungi tenzüktsü ayongzük, ta JAC osang ajanga ashi.
JAC-i Manipur Assembly nung Hill Area Committee dang anogo 10 tsüngda Protection of Manipur People Bill, 2015, Manipur Land Revenue and Land Reforms (Seventh Amendment) Bill, 2015 aser Manipur Shops and Establishments (Second Amendment) Bill, 2015 agientsü tetuyuba agüja lir.
Hill Area Committee-i item bill magientetra züngsem ajaki parnok mokdangtsü ta amokmerena metetdaktsüogo.
Taoba hopta bill asem anema lungkak aitdang nisung 9 tashi asü aser parnok mang marem tashi Churachandpur jila nung shisaliok rejutem ajak shibangtsü JAC-i tetuyuba agütsü.
Bill asemji magien tashi tasür kinüngertemi mangji magizüktsü ta JAC-isa metetdaktsüogo.