CKM lenirtemi Mangkolemba & Alongkima semdang

Mokokchung, August 20 (TYO) : Changkikong Kaketshir Mungdang (CKM) lenirtemi yashi Bodbar nü Mangkolemba ADC aser Alongkima EAC Headquarters semdangogo aser iba mapang sorkar ketdangsertem den terenlok mapatem aser nübortem timtemba tia indang ken o lemsatepa liasü.
Tanü Brehostibar nü AKM office nung osangbenertem den jembidang, CKM tir Wb.Subongyanger Tzudir-i ashiba agi, parnoki Mangkolemba nung ADC tasenba, Imtiwapang Aier aser Executive Engineer PWD (R&B) na ajuru aser Alongkima nunga EAC, Lungmai ajurua nübortem asoshi Mangkolemba nung terenlok mapa shitak inyaka aotsü asoshi shisalemsatepa liasü. Iba mapang sorkar ketdangsertemia akok tashi Mangkolemba aser Alongkima na prongla nung terenlok mapa shitak inyaka aotsü merangtsü ta shia liasü.
CKM-isa parnoki akangba ama Alongkima nung EAC yokba atema sorkar dang pelaba metetdaktsü aser ketdangsertemi tang nungi tali temulung agüja nübortem asoshi inyaktsü imlar ta CKM tirisa metetdaktsü.