Clean election! Clean election! Clean election!!

– Er. C. Kazükaba Jamir,
S.D.O (Retired) Naga United Village, Dimapur: Nagaland.

Clean election atema Langpangkong Kaketshir Mongdang nungi jembi tenzükba tanü joko yimtsüng, Arogo Mongdang aser lokti yimden ajak den jembimaogo. Joko tebang o (therotical) ojang dang jembiyongja jungdisü ta bilemer. Saka mapa agi (Practical) inyaka aotsü asoshi renema atatsü mapang tongja tongogo, kechiyong mapa medenra tebang o jembiba kisüng jibo amajok dang asütsü. “Koya mongdang nung parnoki danü (cat) tekong nung tsüngtsüng azüktsütsü renem, saka shingaia mazüktsütet ama akümtsü.”
Asenoki candidate ji tongmelang, ajemalu aser ochishir nisung dang aginer, saka yamala nisungji teimbaka shisa maka, tangar memenep, ketdangsütsü mashi, policy kecha memetet aser sowar dang alir. Aji asünung kü tebilembabo elecion-i iner ajak idakjang, saka asenoki melungba ka dang shimtsütsü. Iba shimtsü asoshi pei sasa pei meyong vote enoktsütsüla. Pei sasa pei senti vote enoktettsü asoshi lenmang aika lir. Item rongnung ajaki inyaktettsü mapa ka indang shiner.
Taoba election tashi vote agütsüi aitsü asoshi first come first yimya/inyakyim amshi. Iba jagi vote tama enoktsütsü oa polling station tongaka kilung nung polling agent o polling officer temi electoral roll nung tenüng kar tejaklen kar tesülen aser kar tom nung ta aliba lushia bushidang mapang talanglang agi. Aji dang masü iba yimya/ inyakyim nung proxy vote enoktsü lenmang sadema angur. Iba jagi taoba mapang asenok aikati pei senti vote meinoktsütet meyipa oadok.
Anungji tang nungibo polling station ajak nung electoral roll nung tenüng aliba serial wise yimya/inyakyim agi idaktsütsü temzüng tajung yanglutetra polling agent o polling officers atema mapa melaba dang masü, saka proxy vote enoktsü lenmang khenyongi malitsü, kechiyong serial wise yimya/ inyakyim nungbo ner kibong, ozü kibong aser par kibong ta tatongsen agi aitsü. Anungji kibong tejangja ana yongtsü nung tangar (proxy) aittsü lenmang kecha madoktsü (Election conduct rule nunga serial wise inyakyim tajungba ta alitsü südi)
1982 General Election agidang ozü yimdak polling station II nung serial wise yimya/inyakyim nung onok vote enoktsüba bilemteter. Iba yimya/inyakyim nungbo tama aitsü raktepa nongteptsü nüngdak mali. Yangibo kibong kibong tarensena nokdaka atar mela mela-a vote agütsür jangratemtsü keta liasü aser nisung ajaki pei senti vote enoktsütet.
Tanüa nüburtemi serial wise yimya/ inyakyim ya junger ta agizükra tang nungi Arogo, lokti, yimden aser nübur ajak longjemer temzüng takhang renema atatsüla. Ano kodang polling Officials aser security pur tesem tonga arudir renema akaba temzüngji parnok nem metetdaktsütsü aser ibaji nübur ajak dang sangdongtsüla. Yamai serial wise yimya/inyakyim nung temzüng takhang yanglua yur election agira kodaser asenoki pei senti vote meinoktettsü?
Kibong ajak nung wako songdaka yur, nisung shia pledge card nung sign süa yur nü senti vote tangari enoktsür lira kanga tesasatsü asütsü. Kechiyong electionji election: serial wise mamshira asen senti vote amajok akümtsü. Anungji pei senti vote pei sasa enokteter aseni molungba yimsüsür tajung shimtsü asoshi serial wise yimya/ inyakyim agi inyak nungbo jungdisü ta kü tebilemba ka zülur.

You must be logged in to post a comment Login