Clean Election

– Tiawati Jamir,  Lower Bayavu Hill, Kohima.

Ao lima nung ABAM aser LKM-i anier clean election camping kanga junga odagi.Aser lokti senden balala nung clean election indang lemsatepdagi. Tongtipangsa clean election ayongertemi, yimtsüng sema nübortem nem clean election tetezü kechi, aji angatetdaktsüa tangatettba tajung agüja jajaba tsüngsü ngua arudagi. Asenoki tamasa Clean election ya kechiba nüngdaker? Iba ocetji angatettsü merangdi.
Asen lima nung küm aika election junga magitettba aser yimsüsür shimba maparen nung memeshiteti inyakba ajanga asen lima teraksa adokba asenok ajaki ngua arudar. Item teraksaji jakdaka mejembiaka asenok ajaki kanga junga meteta lir.Talisa asen Ao lima nung election agiba maparenji reprangdangra, election merakteta aser temzüngi nübortem nem temeten agütsüba ama election agia aruba yimtsüng aika nungbo mangutsü.Aser iba teraksaji kong nungi ta süra; yimtsüng aika nung senso mesüra yimten candidate shimba ajanga lir ta asenok ajaki meteta lir.Tir yimyim adok shia tsünglanglen tapak tila ka nung teti olong ka clean election asoshi zülua angutsü. Item olung rong nung tetezü tulu aketba olong ka shimteta ni yamai lemsatepnur.”Nu tarutsüji nü dak dang keta lir, nai vote shidak agütsüra nü tarutsü ajungtsü” Tetetzü, nisung shia-i pei vote pei-i agatsütsüla, aser iba ajanga ochi yimsüsür shimtettsü, aser alima nübortem asoshi ochishia mapa terenlok inyaktsü ta tamang tulu nung, nübortemi voteji agatsütettsü asoshi Clean election nüngdaka nübortemi ayimtener.
Kechiba senso aser yimten candidate shimba ya majung ta jembir ? Asenoki aji ken shisadangdi. Kodang Senso aser yimten candidate shimdir, terenlok mapa aser nübortem asoshi inyaktsü nüngdakba maparentem ajak senzüka toktsür, aser nisung kar dang ajangzüktsü mechi nung nübortem nem tangatettba mashikoshi agütsür aser nübortemi iba sentong nungji hai haura akar aser election nung senso ajak indang voteji nisung teshimtet kari dang agütsür. Iba inyakyimji kenyongi ozüngi memelaba aser miemchir ka nem Tsüngremi taso-dang nungi temeten agütsür alimai yokba anema inyakba maparen lir. Iba amala maparen ajanga nübor shidak miemba lenirji meshimtetter aser teraksa jenti adokdaktsür. Anungji nübortemi iba ashikülak maparenji tai ta angatettsüla aser iba maparen ajanga senso tajung lenir aika rakzüktemer rongnung züngsemtsüsa akümer. Anungji Aoer yimtsüng ajaki senso aser yimten candidate meshimtsü asoshi shisa agütsüteptsüla. kichiaser tesüiba mapangtemji asenok ajaki mangateti tamajung inyakogo aser iba ajanga alima raksaogo aji asenok ajaki kanga sasaa bilemer. Anungji asenoki asen yimsüsür shimdang joko muromuro, ampangyim aser rakzükraktem mapa meinyaktsü telemtetba agidi. Aser asen Aoer ajagi koba yimtsüng nung senso mesüra yimten candidate shimter, iba yimtsüngji clean election sentong anema inyakba yimtsüng ta shitettsüla aser amangba pur ajaki iba yimtsüng yimten yimsüsürtemi angatettsü asoshi shisa tajung agatsütsüla aser iba ozüngji indokdaktsütsüla.
Tawa yimtsüng ka nung yimten candidate shimba ajanga yimtsüng nung nübortem tsüngda mepetmesü adok aser ibaji asoshi lanur pezüi par yimer yimten okadaki anier aoba osang kaket nung züngshiogo. Iba ama tasütait lanur asen Aoer rongnung adoktsüla aser asen lima nung temelenshi tulu bener arutsü asoshi iba ama mapa tajung inyaktsü lanur ajaki jangratsüla. Parnoki inyakba mapa ajanga tulur aser tilar,takar aser sensaker, lajar aser leni moer ajak pei temeten wazüka ayutsü asoshi tebang agi jembiba dang masü saka mapa agi nübor khuret bena inyaka sayur ta angatetter.
Tatem nung, ABAM aser LKM clean election camping nung tongti liner süa jajartemi nübor nem angatetdaktsütsübaji senso aser yimten candidate mishimtsü akangakanga sangdongtsüla aser yimtsüng kar nung senso aser yimten candidate shima lira; aji kanga sashia nokdangtsüla aser sayadaktsütsüla. Kechiaser, Senso aser yimten candidate shimbaji nübor ashioktsüba aser tarutsü lanur putu asoshi tajepba, tejashi, teraksa,atakatem aser azü tokshiba bener arutsür ta angatetdaktsütsüla aser ano talisa iba maparenji clean election nükjidong anemba maparen tulutiba aser election temenen tera tulubaji lir ta metetdaktsütsüla.
“Shibai Senso aser Yimten candidate sünur, pai pasasa ni nübur madak yimsu asütsü metemsü ta kuli tejangja agütsür .”