CM-i nangzükba nung ajemdaker PCC-i lungkak aitba anena atar

Kohima, November 18 (TYO): Public Coordination Committee (PCC)-i anogo asemnü lungkak aitba sentong alitsü ayongzükba anena atatsü telemtetba agiogo.
Yashi senden nung Chief Minister T R Zeliang aser par cabinet züngsemtemi Lokayukta tentettsü atema mulunga agizükba aser Hombarnü iba onük atema PCC pur Standing Committee den senden amentsü jazükba den winter assembly session nung Lokayukta Bill benoktsü nangzükba nung ajemdaker lungkak aitba anena atatsü telemtetba agi, ta PCC Media Cell sangdong ka nung metetdaktsü.
Chief minister-isa tan ita Cabinet senden ka amentsü aser iba mapang October 26, 2017 Office Memorandum meyipa agitsüba indang onük benoka olemteptsü ta nangzük, ta Media Cell sangdong nungsa shia lir.
October 26, 2017 Office Memorandum ajanga Class-III mapatem ajak NPSC nungi agien. Department kari Grade-III mapatem indang advertisement agütsütsü tenzükogo anungji iba OM ya agiena atatsüla ta PCC-i takhangba agütsü.
October 26 OM magien tashi PCC-i department kecha nema departmental exams magidaktsütsü aser iba nung kodamasüba timtem kar ajurura PCC-i khuret mabentsü, ta parnokisa ashi.