CM Zeliang-i Tri-Nation Unity & Harmony Motorcycle Expedition tenzüktsü

Kohima, November 14 (TYO): “Friends of the Hills people” omen nung ajemdaker state nung nüburtem den teti yimjung nung alitsü asoshi Nagaland Chief Minister T R Zeliang-i tanü Assam Rifle our ayongzük.
Assam Rifle indang Tri-Nation (India, Bangladesh aser Myanmar) Unity & Harmony Motorcycle Expedition tenzüktsüba sentong ka nung Inspector General Assam Rifle (North) Maj. Gen Sanjay Gupta-i anir ketdangsertem den jembidang Chief Minister-i iba o ya ashi.
Linük asem nungi arrtsü anükba mitkartem den tesendaktep tali yanglushitsü nükjidong den yimjung aser adianu ama alitsü osang sangdonga jajar nisung 33 yashi nikongdang Imphal nungi Kohima atong.
Iba sentong ya October 29 nü Shillong nung tenzük aser iba expedition ajanga India nung North East nung aliba Meghalaya, Assam, Tripura, Mizoram, Manipur aser Nagaland state tem sema jajar Bangladesh aser Myanmar linüki aotsü aser Shillong nung November 17 nü tembangtsü aser iba mapang parnoki kilometre 2150 jajatsü.
State nung Assam Rifle temi tanükba agütsüba den külemi yimjung nung yutsüba kisüng masü saka yimdak yimtsüng nung tashi oa teyari balala agütsüba asoshi Chief Minister-i pelaba shisem.
Linük nung teti asoshi yimjung bener arutsü ya Indo-Naga yimden ken o dak keta lir anungji Assam Rifle temi state sorkar den külemi yimjung asoshi mapa inyaktsüla, ta Zeliang-i ajungshi.
“Kidanger linüktem den yinjung nung alitsü asoshi iba expedition sentong ya kanga tajung lir aser arrtsü anükba mitkartemi iba ama sentong tajung ayongzükba ajanga Bangladesh, Myanmar aser north east state tem ajangzüktsü,” ta CM-i ashi.
Iba sentong ajanga lanurtemi bike anitsü sempet tendangba kisüng masü saka north east region aser Nagaland tesem balala tejangjaba nung metettsü, ta Zeliang-isa ashi.
India nüjiso ngur mezüng Home Minister inyaksang aser ‘Iron Man of India’, Sardar Vallabhbhai Tatel, shibai linük nung chuba yimli tilala aliba ka küma longjemdaktsü, pa nüngtem nung amungba “Unity Day” nung Assam Rifle temi iba expedition ayongba asoshi Zeliang-i tepela lemsatep.
Iba sentong ajanga north east region nung aliba nüburtem tsüngta adianu ama ka küma longjemshitsü imlar, ta iba expedition nung Tema Leader Col. Pratyush Kumar Singh Gaur-ia ashi.
Iba sentong nung Nagaland Minister Imkong L. Imchen, Dr Niekiesalie Nicky Kire aser E E Pangteang aser Parliamentary Secretary Toyang Changkong Chang, Dr Neiphrezo Keditsu aser Kropol Vitsu nunger den IGAR (N) Maj. Gen. Sanjay Gupta densema liasü.