Cong aser Modi napronglai lanur nem mapa magütsütet: Rahul

New York/New Delhi, September 20 (Agencies): Congress tatong Tir, Rahul Gandhi-i, Congress Party-i aniba UPA sorkari anogoshia linük nung mapa 30,000 adokdaktsütsü ta nangzüka liasü, saka meinyaktet, aser tang Centre nung BJP-i aniba NDA sorkaria iba onük nung tamakok nguogo, ta ashi.
Princeton University indang Woodrow Wilson School nung tesayurtem aser kaketshirtem den jembidang Rahul-i, “Onoki anogoshia mapa 30,000 madokdaktsütetba agi onok (Congress) dang jashir kasa nisungtemia tang Modi dang jashidar,” ta ashi.
India nütsüng aika mapa mengui lir, aser iba atemaji sasaa bilemer, ta Rahul-i ashi.
“Democtratic linük ka nung mapa manguba tebilemtsü ya komaser koktettsü, iba ya tayongzükba tulu ka lir, aser Congress-ia iba nungji tamakok angu, ta ni odiodia ashir,” ta Rahul-i nangzük.
Election nung takok nguaka Narendra Modi (Ato kilonser) aser BJP-ia mapa adokdaktsütsü atema nangzükba ama inyaktsüji kanga tongibang ta mebilemer, ta paisa ashi.
Rahul Gandhi-i hopta ana atema tang United States semdanga lir, pai telok balala aika den senden menogo, aser ano telok aika den senden amentsü sentong lir.

You must be logged in to post a comment Login