Congress pur teimla

India nung Congress aluba mapang ka, tang Rahul Gandhi Congress tir akümba ya Congress asoshi teimla tasen ka bener arutsüba mapang ka asütsü. Atangji, jungjunga reprangdangra, nisung melener dang ashi, tang Congress tir shimba ya tetsü o par jabaso na menden melenteperba dang lir. Iba jagi nisungtemi Congress telok yabo kibong ka yimsüsüba kübok dang anidaka aruba telok ka lir ta jembir. Ibaji shitak kechiyong Jawahralal Nehru sülen Indira Gandhi aser iba sülen Rajiv Gandhi ta yimsü süa aruba sülen Sonia Gandhi leniba nung Congress arur, tang Rahul Gandhi nem melenoktsür. Aji oda, ato kilonser mekümaka iba tsüngda nungji Sanjay Gandhi-a party nung liasü. Iba amaji, kibong ka nungi dang melentepa aruba agi Indian National Congress party yabo akhidang kibong ka senmang ama küma yimsüsüa aruba chuba yimli yimsüsübarenang mesük ta jembir. Ajisüaka, ano külen reprangdangra, Congress nung adenertem rongnung Gandhi’er kinungertem melentsüsa nisung ka jokteta adokba mangur. Ibayongji, Congress lenirtem rongnung Manmohan Singh aser Pranab Mukherjee nungertem ato kilonser aser tir menden tashi atutsüsa nisung liaka parnoka Gandhi’er temoatsü nung maongka agiba dang ashi, parnoksasabo parnoki Congress telokji teponglanger anir moutetter. Iba jagi inyaknüyonga meinyaknüyonga Gandhi’er kibongi Congress tenüng nung khuret abentsüsa akümer. Aji oda, Rajiv tashi ato kilonser inyaka aruba sülen küm ana shi tangar teloki melentepa benerbo ano Congress dangisa yimten tashi aru aser idangjibo P.V.Narasimha Rao ato kilonser akümba mapang ka ajuruogo. Iba mapang otsü tajung kaji Gandhi’er kibong nungi masüba Congress pur yimsüsür kati küm pongo songtema ato kilonser inyaktetba nisungji P.V.Narasimha Rao ya liasü. Iba sülen ano küm ishika tangar yimten teloki yimsüsüa aruba sülen 2004 küm Congress telokisa governmenr akümtsüsa takok angu. Ibajia Sonia Gandhi nem kangshia Congress tir menden agütsür la leniba kübok election agiba ajanga takok anguba mapa ka liasü. Iba jagiang Congress nung nisung tain aikati ato kilonserji Sonia Gandhi asütsüla ta nokdak saka ano Congress purtem rongnung yimsüsür tain Sharad Pawar aser P.A.Sangma nungertemi linük nung ato kilonser asütsübajibo bendanger masü saka India nunger azü agi sosemba senso asütsüla ta nokdakba otsü asenoki meteta lir. Iba nung jagi Pawar aser Sangma nungertemi anir NCP telok tenzük. Election nung takokbo tajung angu saka government akümtsü timatemba mapang ka nung, kanga shisa kaa Sonia Gandhii Congress yimsüsürtem rongnung tain aser rongsenren sentong yangluba nung mongin, Dr.Manmohan Singh shimteta ato kilonser kümdaktsü. Atangji, Manmohan Singh mapa aser kolok agia ato kilonser mapaji bendaktsütsü langa liasü saka Sonia-iang shitakba yimsü asütsü tebilemba nung lai pa shimtet. Iba tashi nung 2014 küm tashi Congress teloki yimsü süa arur tang BJP teloki yimsü südagi. Taoba küm asem tashi nung state tulu aser tila aika nung BJP teloki Congress telok mali küma samatsüdagi. Iba amaji Northeast nunga Assam, Arunachal Pradesh aser Manipur state-tembo BJP teloki agiadokogo aser tanüngba state-tema agitsü merangdagi. Atangji, tang linük nung Congress telok mali küma aoba ya Gandhi’er kibong kisüng taibo masü. 2014 küm tashi nung Congress teloki yimsü süa arudang yimsüsür aikati pei mapa nung ochimashi inyak, iba jagi Congress government-ji ochimashiba government ama kümadok. Iba jagi BJP teloki melamelaa melentet. Iba ama tensa ka nung Rahul Gandhi Congress tir akümbaji pa asoshi tebilemtsü tulu lir. Tang Gujarat nung election lir aser sangküm küm tetenzüklen nungi state ishika nung election agia tenzükbaji 2019 küm Parliamentary election tashi aotsü. Item ajak nungji takok nguyonga aotsüba khuretji Rahul-i agizüktsü. Rahul o jembiba nung tsüngro masongtsüa akok mesüra tangar puatsüsa sempet balaka malitsüa akok, saka pa dak India meimba shisatsü kabo angur, ibaji pai yimtsüng tashi tonga oagi yimtaklirtem ajurur aser tang tashi kibong maküm arema yimten khuret bener jajar. Atangji, memenui paia kenübo India nunger ochishia tenzüktsü maongka angutsü imlar.