CTC nung ‘Urban Transformation’ shisatokden agi

Dimapur, October 18 (TYO) : Clark Theological College, Mokokchung nung “Mokokchung Urban Transformation” ta ser shisatokden ka ayongzüka agiogo.
Iba sentong ya CTC aser Mokokchung Town Baptist Arogo külemi yaritepa ayongzük aser shisalen sayurji The National Centre for Urban Transformation, Director, Dr. Atul Y. Aghamkar liasü.
India nung jila mesüra yimti taküm den sendakteptsüsa tensa ajurubaji alima melenshiba ajanga dang masü saka linük nung kechisarena aika nung temelenshi aruba ajanga lir, ta Dr. Atul Y. Aghamkar-i ashi.
Nagaland nunga jila mesüra yimti taküm den sendakteptsüsa mapang arutsü aser iba asoshi Naga nunger Arogo lennirtemi iba indang osang metetjema alitsü nüngdak, ta Dr. Atul-isa ashi.
Arogo lennirtem Lai O aser tensa den medema jila taküm libaliro angatettsü aser iba ama tensa ka nung tamangba tsütsü temelenshi bener arutsü nükjidong nung iba shisatokden ayongzüka agi.
Iba shisatokden nung Mokokchung kübok Arogo ti nungi sannükertem aser züngsemtem aden.
Dr. Atul Y. Aghamkar ya küm 12 tashi Maharashtra nung Christian & Missionary Alliance atema urban church planter aser pastor inyakogo. Pai Fuller Seminary, CA, USA nung ‘Intercultural studies with concentration in Urban Studies’ nung PhD angu.