DDT arakba ajanga teyari agütsüba aser tanidaktsütem

Nagaland nung küm shia ramen agi aika shiranger aser iba ya nokdangtsü asoshi National Vector Borne Disease Control Program (NVBDCP) puri DDT mozü arakba sentong ya preventive measures rongnung ajak dang nungi tajungtiba lir. Taküma DDT mozü arakba sentong agiogo. Kümtem tsüngda nung nüburtemi parnok kidang DDT mozü merakdaktsünüba reprangtetogo aser ajidang masü technical guideline tem sülen manidakba ajitetogo. Anungji onük kar ajanga kilong aser temeket nung DDT araktsü nüngdakba aser teinyaktsü yimya kar nung koda anidaktsü, itemji yangi tuteta sayuner:
1. Ki temeket nung DDT arakba ajanga merla ajema kümdaktsür. Entomological study tem ajanga sayuba agi, Nagaland nung merlatem DDT ajanga südaktsütettsü. IRS puri kümshia March ita teyonglen khen aser August ita teyonglen khen ta anaben araker, kechiyong iba ita tsüngda nung ramen prokshir.
2. DDT ya tesem aika nung araktsü asoshi jenjang temelatiba chemical lir. Tesem aika nung araktsü asoshi iba melena tanga chemical jenjang dalangba aser effective-ba mali.
3. DDT arakba yimya shidak nung aser iba ya araktsü training agir alirtemi rakra, kilong nung DDT arakba ajanga kecha lendong magütsür.
4. DDT kima nung arakba ajanga kilong nung merla alibatema aridoker.
5. Kima nung DDT arakba ya temang asoshi lendong lir. DDT ya ‘hard’ insecticide ka lir aser iba mozü ya yakta samaa maoer aser ali nung talangka alir. Item ya chiyongtsü ajanga belener aser bio-magnification process ajanga DDT ya tali atsüngdendaktsür.
6. India sorkari DDT ya tashidak balala nungi kümzüktsü asoshi kilung nung dang araktsü asoshi melaa lir. Tanga maparen atema DDT amshiba ya Environment Protection Act 1986, Section 8 anema lir. Iba act nung yamai shia lir “Nisung shingaia ‘prescribed’ süa aliba procedure shidak nung mesüi lendong aketba mozü (hazardous substance) amshitsü makok.”
Kilong nung DDT arakba ya ramen nungi kümzüktsüba atema dang masü saka merla ajanga prokshiba tashidaktem- Japanese Encephalitis aser Dengue amala nungia kümzüker, koba Nagaland nunga putetogo. Anungji tashidak nokdanga ajak ajungtsü asoshi iba ya agizüktsü nüngdaker.
National Vector Borne Disease Control Program (NVBDCP),
Directorate of Health and Family Welfare Nagaland: Kohima

You must be logged in to post a comment Login