Deepak Joshi international umpire inyaktsü shim

New Delhi, August 19 (Agencies): India nung national hockey umpire, Deepak Joshi international umpire asütsü asoshi International Hockey Federation (FIH) ajanga Mongolbar nü shimogo.
July ita Netherlands nung U-21 Volvo Invitational asayamung nung pai umpire mapa kanga takok ngua aser junga inyaktetba sülen FIH-i pa shimoktsü telemtetba agia liasü. Joshi ya 2012 SAIL National College Championship alidang nungi umpire mapa inyaktsü tenzüka liasü.
Taküm 35 buba National Games, Kerala nung asayadanga pa umpire liasü aser National Championships nungbo teti umpire-sa ataa liasü. 2007 küm pa arishi küm 27 asüdang nungi 2010 tashi Uttarakhand team nungi National Championships nung asaya liasü.
Iba sülen 2011 küm National Institute of Sports, Patiala nungi pa Sports Coaching Diploma ka agi aser 2012 küm nungi coach ka ama inyaka aru. Tanga pa Delhi Hockey nung coach mapa teinyakdak lir. Taküm küm tetenzüklen tetsür umpire tem nungi arishi küm 24 tain, Deepa-a international umpire asütsü FIH-i shimokogo.
Tang tashi nung India nungi international umpire nung parnok 13 tashi kümogo (tebur 9 aser tetsür 4).
“Iba ya India hockey asoshi jenjang tulu ka atongba lir,” ta secretary general Mohd Mushtaque Ahmad-i ashi.
“Deepak ya umpire mapa nung kanga dang mongin lir aser pa nem lemzüktsüba mapa ajak kanga nendaka aser meranga inyakba ajanga pai iba akhümket jenjang ngutetogo. Pai iba konang bentsür aruba ajanga Hockey India-ia kanga nüma atanger,” ta Ahmad-isa ashi.