Delhi sorkari Nov.13 nungi Odd-Even scheme tenzüktsü

New Delhi, November 09 (Agencies): Delhi-National Capital Region nung alirtem mokozü den tzüsü agi maneni timtemba mapang nung Delhi nung Aam Aadmi Party (AAP) sorkari November 13 nungi November 17 tashi (anogo 5) odd-even scheme tenzüktsü atema telemtetba agiogo.
Tang tashi nungbo official süa iba osang sangdonga mali, ajisüaka AAP tongti lenir aser Delhi Chief Minister, Arvind Kejriwal-i twitter ajanga anogo pongunü odd-even scheme benoktsü, ta metetdaktsü.
Tamalen Arvind Kejriwal-i, Odd-Even formula benoktsüji yimti aser temeket tesemtem tensa dak keta lir, ta metetdakja liasü.
Osang angazükba agi, sorkar agency tem aser Supreme Court-i tentetba pollution monitoring tentet, EPCA nungi züngsemtem tanü nikongdang senden ka amenba mapang nung iba telemtetba agi.
Central Pollution Control Board (CPCB) member secretary, A Sudhakar-i, “Anogo ananü tashi mopung kanga menenba onoki jangjaogo. Brihostibarnüa air quality index mejungra onoki EPCA dang odd-even scheme benoka inyaktsü atema benoktsü,” ta metetdaktsü.
Brihostibarnü Delhi tesem aika nung mopung quality kanga majungba category nung liasü. Mopung menena mepet tzüsü ajanga tanü train 41 tashi menor yimti atong aser train 10 bo thinena liasü.
Bodhbarnü state tesem aika nung PM2.5 levels “severe plus” category nung liasü. Lodhi Road, Delhi University north campus aser Mathura Road ama stations nungbo microfine particles level ji ‘safe limit’ nungi 20 ben agi tali atu.
Osang angazükba agi, Brihostibar anepdang 7:30 ako nung Delhi air quality index (AQI) ji 468 liasü, aser ibaji Mongolbar (AQI 448) dang nungi tamajungba liasü.