Dengue atema vaccine inyakyim tasen ka ngutetogo

New York, Aug 4 (Agencies): US nung aliba bushisüngdangertemi vaccine amshiyim nung temelenshi tulu ka adokdaktsüogo—-Vaccine magi-i dengue mesen nungi kümzüka litettsü tasa ka ngutetogo.
Iba bushisüngdang nung shiruru kar dak ‘synthetic DNA’ tuoktsü aser ibaji ajanga dengue mesen nokdangtsü atema ‘antibody’ ka taginüba ama adokba puteta liasü. Iba tongutetba ajanga dengue atema vaccine balaka magiyonga ajungtsü, ta parnoki ashi.
Iba inyakyim dang DMAb ta ajar aser shiruru dak iba ya tendangba mapang kanga kara mapa inyak, ta parnoki hopta ka shi tendangba sülen ashi.
“Onoki temang nung ‘synthetic immune response’ ka adokdaktsütettsü aser ibaji taküma masü, mesena masü aser teti alitsüa masüba ‘antibody’ ka lir,” ta University of Pennsylvania, Philadelphia, US nung professor aser iba bushisüngdang nung author David Weiner-i ashi.
Dengue mesen ya merila ajanga nisung mang nung temdaktsür.
Tang tashi nung linük 100 dak tema nung dengue tashidak ajanga kanga timtemteper koba ajanga rongsen tsütsü-a takoksa aludaktsür.
Tang tashi nung nguteta aser yangluteta aliba vaccine tem ajanga dengue mesen telemsa pezü prongla kanga jungbo menokdangteter.
Tan tasen ngutetba DNA inyakyim yagibo antibody yangluba sülen cell den alentepa mayur aser ibaji ajanga dengue mesen den kanga sademsadema rara nokdangteter.
Iba tongutetba ya ‘Scientific Reports’ kaket nung adoktsüogo.

You must be logged in to post a comment Login