Dera Sacha Sauda nung IT tekolak Vineet Kumar apu

Chandigarh, September 13 (Agencies): Ashishitep aketba Dera Sacha Sauda nung IT tekolakba Vineet Kumar police-i puogo. Pai Dera Sacha Sauda headquarters nung computer tem nung tim mesüi kongshiba atema tai tonglokja apu.
Dera Sacha Sauda tanishisang Gurmeet Ram Rahim Singh ya tang küm 20 atema tepuokdak yua lir.
“Police-i yashi Dera Sacha Sauda IT tekolak Vineet Kumar apu aser pa ket nungi hard disks 60 puogo” ta Sirsa Superintendent of Police, Ashwin Shenvi-i ashi.
Bushisüngdanga arudang Dera ketdangsertemi Sirsa nung aliba headquarters nung hard disks aika melen ta kuli angu, ta paisa ashi.
Sirsa nung aliba headquarters nung bushisüngdang masüdang, Dera indang computer tem nung teka ai aser hard disks kar agien mesüra raksa. Iba tesem nung Punjab and Haryana High Court-i shimba commissioner ka lenisüba kübok bushisüngdang asü, ta Superintendent of Police-ia metetdaktsü.
Kumar-i computer cell indang osang miimbtsü merangba atema yashi pa dang asüngdangya asütsü atema police-i aja.
Ano, police-isa Harmel Singh ta ser Lexus SUV gari anisang puogo. Iba gari ya Dera indang lir aser August 28 nü, Gurmeet Ram küm 20 tepuokdak ayutsü obendang agütsüba anogo Phoolkan yimtsüng nung mi agi rongdok, ta Ashwin Shenvi-isa shisem.
Harmel Singh ji Rajasthan nung apu. Pai teraksa bener arutsüba aser kuli samatsüba atema tai tonglokja lir, ta paisa ashi.
Maneni, police-isa tanü Ambala nung Bhag Singh ta ser Dera züngsem ka apu. Pa ket nung sen lakh 14 bena alia puogo.
Sirsa nung aliba headquarters nung Ram Rahim’er kidang nungi tetsürtem indang hostel den sendaktepba miim lenmang ka ngutetogo. Bushisüngdangertemisa AK-47 injangtem aser ozüng alema lapokba firecracker factory ka ngutetogo.
Okadaki Ram Rahim dak tai tongloktsüba sülen hopta ana shi lir külen Dera indang headquarters aser kiojeten mita aotsü tenzük.
Dera indang headquarters nungsa school tem, sports village ka, hospital ka, shopping mall ka aser cinema hall ka lir. Iba tesem nungsa ‘7-star MSG resort’ ka lir aser iba nung Eiffel Tower, Taj Mahal, Kremlin aser Disney World tem mesüka yanglua lir.