Dhoni AN-32 nungi parachute nung pongzük

Agra, August 19 (Agencies): Tesüiba mapang India test asayar captain aser India sorkari Lt. Col tenüng agüja alisang, M.S. Dhoni Bodbar nü AN-32 tayimtsü nungi feet 1,250 azük nungi parachute nung pongzük.
Iba mapang osangbener ka danga pa den ajurutepa o mejembidaktsüi noktanga ayu. Ajisüaka Malpura drop zone ketdangsertemi ashiba agi iba sentong takok ngua agitetogo aser pa kanga junga pungzüktetogo. Anasa aliba yimtsüngtem nungi nüburtem aika iba nüngtugu nisung reprangtsü asoshi sentep.
50 buba Independent parabrigade meyong Para Training School (PTS) koba Bangladesh, Sri Lanka aser Maldives nung mita aoba mapang nüngtugu aküm, iba tesem nung pa hopta ana tashi tan tayimtsü nungi pungzüktsü asoshi training agia liasü.
Bodbar nü pa den külemi ano nisung 12 shi kasa tayimtsü nungi parachute nung pungzüka liasü. Tanü tayimtsü nungi pungzüktsü sentong jakdang, ground test tatemsabuba pai Mongolbar nü ajangteta liasü.