Dmr nung Godzilla coil ayoker 3 apu

Dimapur, Aenjeti 12 (TYO): Aenjeti 11, 2018 nikongdang 4:00 ako meta Dimapur police den AET Zone-I Dimapur-i Central Insecticide Board temalaba magi Burma (Myanmar) nung yangluba kidanger state temi shibelena bener arua ayokba- sub-standard mosquito coil “Godzilla”, Hazi Park Dimapur nung mita ao, aser iba mapang nung tim ketdangser nungi temelaba kaket maliba atema Hazi Park aser Kalibari Road Dimapur nung aliba godown ana nungi cartoon 120 apu (cartoon shia nung packet 80 lir), ta tanü Addl. Dy. Commissioner of Police/PRO, Dimapur, Nagaland sangdong ajanga metetdaktsü.
Mongintemi ashiba agi, item coil nung aliba ‘common active ingredients’ ji allethrin, d-allethein, Dynamin forte aser ETOC ama Dyrehriods tapu aika lir.
Octachlorodipropylether ya khenkhenbo synergistor active ingredient ama amshir, aser item ama coil amshiba ajanga tepokpok nung cancer adokdaktsür. Mosquito coils kar nung iba chemical densema lir, ibayongji linük aika nung iba ya nokdanger. Merla nokdangtsü atema mosquito coil arongba mapang nung aldehydes, formaldehydes, fine & ultrafine particles benzene benzo (a) pyrene, benzo (b) fluoranthene adokdaktsür, aser item nungji meimchir dak cancer tashidak adokdaktsütsüsa lir.
Item ama chemicals karbo insecticides lir, aser ibaji Godzilla mosquito coil nung angur. Tongtibangba chemical, koba dang menerfluthrin ta ajar, iba chemical ya Godzilla mosquito coils nung amshir, aser cancer tashidak adokdaktsüba tongti kuliji iba ya lir, ta mongintemi ashir.
Mosquito coil ka arongba ajanga cigarette (moko) 75-137 arongba ajanga particulate matter adokdaktsüba den kasa adokdaktsür.
Authorized products ji import export license alirtemi dang bener arutsüla aser iba product nungji batch number aser expiry date alitsüla. Myanmar nungi bener aruba products aika unregistered lir aser meimchir atema majung.
Iba ken o dak sendakba nung nisung asem- Ashok Kumar (N.L Road Dimapur nung telidak), Suresh Kumar (Marwaripatti Dimapur) aser Rupesh Kumar (Thakurbari) nunger puogo aser maneni bushisüngdangtsü atema East Police Station Dimapur nung ken o ka benokogo, ta kasa sangdong ajangasa metetdaktsü.