Dolly Parton-i Guinness World Record ana nguogo

Aenjeti 19, 2018 (Agencies): Chart nung otsü yangluba ajanga Dolly Parton nem Guinness World Record ana agütsü.
Arishi küm 71 tain, country kentener mongin nem iba sempet ana ya Billboard Hot Country Songs chart nung tetsürtem rongnungi hits timtiba asüba (107) aser kasa chart nung Top 20 hit ka küm 60 shi aliba atema lir, iba rongnung lai 1967 küm züluba ‘Something Fishy’ ken densema lir.
‘Jolene’ ken atenlai Reba McEntire aser asür Elvis Presley nungertem ajateta iba alizüng tongtet.
2018 indang Guinness World Records kaket nung tesem nguteta sempet ana agizükba sülen Parton-i: “Guinness World Records ana agizüktsü ya jangratemtsü lir. Tesüngmangtsü kentener aser ken mejemertem nem iba ama sempet agütsür alirtem den densemtsü ya kanga balaka amai bilemer. Nai mapa inyak tenzükdang koma tembangtsüar memetet, saka iba world record ana anguba ajanga ni kanga ajemalua aser temoatsü nguogo!” ta ashi.
Item chart tem rongnung ka ya lai 1974 küm atenba classic ‘Jolene’ lir, koba nung la den Pentatonix densema 2016 küm No. 18 tongtet.
‘9to5’ ken atenlai la wadang nung kanga kera bo manentsü amai sayuteta taoba küm tatemlen tanurtem indang kensep ka lai saya lir.
Nashville nung soa intetla indang ‘I Believe In You’ kensep ya 2016 küm ‘Pure & Simple’ kensep sayar küm ka majungdang saya aser iba ya lai mezüng kensep, ‘Hello, I’m Dolly’ sayar küm 50 sülen sayaba lir.
Iba kensep nungi aazükba sen ya Parton indang charity Imagination Library nem tenla agütsür, koba ajanga tanur tila asüdang zülutsü aser azüngtsü atema teyari agütsür aser tanur sozükli nung arishi küm pongu tashi atema kaket angadi agütsür.
Iba otsü yanglutetba indang jembidang lai, “Kü indang mezüng kensep sayar küm 50 jungogo aser iba sülen küm 50 ya jangratemtsüka liasü. Item küm 50 nungi tanurtem asoshi mezüngbuba kensep yanglutetba asoshi ni kanga pelar. Iba kensep nungi aruba sen Imagination Library-i aotsü aser iba ajanga ni nüma danga bilemer. Imagination Library tenzüker küm 20 jungogo. Kaket million 100 tanurtem ket tongtetba asenoki nguogo aser anu aika alitsü imlar,” ta ashi.