Donald Trump-i $7.85 billion teyari meshir

Washington, September 2 (Agencies): US President Donald Trump-i Congress dang Hurricane Harvey ajanga teraksa bener arutsüba nung yariteptsü atema sen $7.85 billion teyari meshiogo, ta White House budget director-i metetdaktsü.
Trump-i teyari meshiba nung Federal Emergency Management Agency indang Disaster Relief Fund nungi sen $7.4 billion aser Small Business Administration indang disaster loan program nungi sen $450 million dena lir ta White House budget director Mick Mulvaney-i US House of Representatives Speaker Paul Ryan dangi züluba shidi nung shia lir.
“Yipru ajanga takoksa ajuruba state tem yaritsü ta tiri tenangzükba agiba atema iba senotsü teyari aginür aser maneni tarutsü anogotem nung teraksa bener arutsübatem yanglutsü atema teyari meshitsü” ta Mulvaney-isa ashi.
Harvey yipru ajanga Houston aser Texas kübok tesem balala metzüngbangba nung yariteptsü atema Trump-i sen $5.95 billion meshitsü akok ta nisungtemi bilema liasü.
Texas Governor Greg Abbott-i ashiba agi, par state-i sen $125 billion dak tema nüngdaktsü akok.