Dorians Society-i achaayanga basketball clinic ka katar

Dimapur, September 8 (TYO): Nagaland Basketball Association den külemi Dorians Society-i achaayanga Dimapur Government College basketball court nung Hokolbarnü nungi anogo ana basketball clinic ka tenzükogo.
Iba anogo ana sentong ya asayar, referee aser coach tem atema lir. Mezüngbuba anogo nung asayar ajak agi parnok 25-i iba camp nung adentsü asoshi züngoksema liasü.
Iba clinic atema sentong ayongertemi national aser international jenjang nung tajangshiba tajung ngua alir coach ana aser referee ka ta anir arua lir.
Coach anarongnung kaji Satyabrata Nayak lir, shiba tang Indian Railways tetsür team coach lir. Pa küm 20 shi basketball asayaa aruogo. Nayak senior national team nung 1992 nungi 2005 tashi asayaa liasü.
Pa 2010 küm nungi coach ka ama shilem agir aser pai aniba telok Eastern Railways tetsür team-i All India Inter Railways Championship 2013-14, 2014-15 nung tasembuba jenjang tongtet aser 2015-16 küm gold angu. Pa lenisüba kübok Indian Railway tetsür team-i Senior National Championship 2016-17 nung tasembuba jenjang tongtetogo.
Amalendu Kumar Singh ya tang West Bengal, youth coach lir aser pai 1992 küm Junior International nung shilem agi aser 1991 nungi 2011 tashi Senior Nationals nung shilem agi aser 1997-2009 tashi Dhaka nung professional league nung shilem agi.
Atanu Banerjee ya professional International Basketball Federation (FIBA) referee lir aser pai international asayamung aika nung shilem agiogo. Pai referee ka ama tetsür under- 19 Asian Championship Bangkok (2007) nung asayadang shilem agi, tebur Asian Champions Cup Kuwait (2009) nungi asayadang shilem agi aser ano pai shilem agiba tanga aika rognungi South East Asian Games, Jakarta (2014) nung asayadanga shilem agia liasü.