DPC-i Shantanu tepsetba aitsür

Dimapur, September 21 (TYO): Tripura nung local news channel ‘DinRaat’ atema inyaker television atema osangbener, arishi küm 29, Shantanu Bhowmik tepsetba osang angashia Dimapur Press Club (DPC) aoksar, aser aitsür, ta tanü DPC Tir, Moa Longkumer aser tongti tezülur, Henlly Phom nati sangdong ka ajanga metetdaktsü.
September 20, 2017 nü Tripura kübok Mandai nung yimtenren party ana- Indigenous People’s Front of Tripura (IPFT) aser Communist Party of India (Marxist) indang tribal wing Tripura Rajaer Upajati Ganamukti Parishad (TRUGP) na tsüngda raratepba osang abentsü atema Shantanu ji iba tesem jagi oa liasü.
Nisung ka pei mapa inyakba mapang nung tepsetbaji DPC-i aitsür, ta sangdong nung shia lir.
“Tawa-tanü linük nung journalist tem tepsetba kanga bulua kümdar, ajisüaka linük nung sorkar balalai democracy tongshi pezübuba nung züngsemtem kümzüktsü atema kecha meinyaker. Tawa Northeast nunga osangbenertem anema inyakba kanga bulua kümdar, aser ibaji ajanga ozü külem tenzüker aika asür,” ta DPC-isa metetdaktsü.
Dimapur Press Club-i Tripura nung osangbenertem den mangyim lemsateper, iba den külemi Manik Sarkar-i aniba sorkar dang TV journalist tepseter nem tapet temerenshi agüja tansütsü sayuang ta akhanger, ta metetdaktsü.
Iba ken o nung police-i pua aliba nisung pezüji mechioktsüla, ta DPC-isa ashi.
“Iba ama mangyim mapang nung DPC-i asür kinüngertem den mangyim lemsateper, aser Tsüngremi parnok nem tesünep agüjang ta sarasademtsür,” ta kasa sangdong ajangasa metetdaktsü.