Duterte-i ‘Revolutionary Government’ ka tentettsü amokmerener

Manila, October 14 (Agencies): Pa atsüngdoktsü merangba maparen nokdangtsü tangatetba nung Philippines tir Rodrigo Duterte-i “revolutionary government” ka tentettsü renema lir ta osang metetdaktsüogo.
Hokolbar aonung pai iba osang yimjak nung metetdakja liasü. Iba mapang pai press, Europe nunger yimsüsürtem aser pai mozü anema raraba mapa aitsürtem den toktepa jembi.
Duterte-i Philippines nung ozüng alema amshiba mozü shibelenertem, ayokertem aser achirtem anema mapa inyaktsü tenzükba sülen nisung meyirjang aika taküm samaogo aser iba atema meimchir temeden teloktemi pa aitsür.
Communists aser pa den toktepertemi par sorkar atsüngdoktsü merangra, pai martial law agütsüba melena revolutionary government ka tentettsü ta Duterte-i ashi.
“Nenoki ni atsüngdoktsü atema mapa inyaker süra aser tensa mejungi kümdaktsüra, ni kecha menungnangi kü kümsük metembang tashi revolutionary government ka kümtettsü. Ni nenok ajak pur tepuokdak ayutsü aser communist tem anema rara tenzüktsü” ta paisa metetdaktsü.
Duterte-isa ashiba agi, pa atsüngdoktsü atema tasa atonga inyakba nung US Central Intelligence Agency dena lir.
“Kü den toktepertem aser communist lennirtem ajak tepuokdak ayutsü. Ni revolutionary government ka jatettsü. Nenok ajak pur tepuokdak ayutsü. Ni nenok tsübudaktsürba masü saka atangji inyaktsü” ta paisa shisem.