EC-i SC dang political party deregister asütsü tashi meshir

New Delhi, Tsüklai 10 (Agencies): Election Commission-i Küptoknü Supreme Court dang parnoki political party tem de-register asütsü tashi agüjang ta ken o ka benokogo aser iba ya kanga dang tongtipang onük ka lir.
Tanü EC-i Supreme Court nung affidavit ka nung iba onük benok aser parnokisa ozüngi tai tonglokja alirtemi political party metentetdaktsütsüla ta asüba ken o ka pusema nungit.
Tang ya EC-i political party ka register asüba dak alaka de-register asütsübo tashi mali. Ano, Representation of the People Act, 1951 nung political party ka de-registration atema onük balaka benoka mali.
EC-i tesüiba küm 20 tashi Representation of the People Act, 1951 yanglushitsü aser political party tem de-register asütsü atema Centre sorkar dang asüngdanga arur saka tanü tashi ibaji mapa küma meinyakteti lir, ta affidavit nungsa shia lir.
1998 küm EC-i mezüng atema Union Law Ministry dang de-register asütsü atema tashi meshi. Political party aika register bo süa ayu saka election ka nung danga metokteper, anungji item party mesükbatem de-register asütsü atema tashi meshia liasü ta tanü EC-isa metetdaktsü.
Iba onük ya Supreme Court-i Tentonü angadangtsü atema anogo latetogo.