Election atema khuret bendi

– Among P. Aier

Nagaland nung election agitsü asü magitsü ta asüba tensa ka asenoki ajurua lir saka political party aser candidate temi parnok election-i aitsü ta shia nüboyimba mapabo kanga mazüngi inyaktepdar. India kübok state ka asünung aser India linük temzüngi alenbanga ali asünung, asenoki memulungaka state assembly election ji agitsüsa akümtsü. Ano talisa Naga yimten olemtep atema tiyongtsü nung jembir R.N. Ravi-i Naga yimten latettsüba aser assembly election naji khenyongi balala aser sendaktepa mali ta jangjajangja shiogo, anungji 13 buba Nagaland Assembly election ji agiküm. Khristantem teimba ser aliba Nagaland nung tamangertemi sen kangasa meimer aser sen yong pei temeten yoka achitsü kecha marentaker. Talisa election mapang tamangertem kanga dang mazüngi takar akümtsü merangteper aser candidate balala den ajurutepa mesüra tongtepratepa odiodia sen meshia agir. Küm aika iba inyakyim tamajung aser tim masüba tangatetba ajanga yimsüsürtem shima sorkar ketdangsüdaktsüba ajanga Nagaland state jenjang tamajung nung tamajungba küma arur. Ajisüaka, Naga nunger kanga dang tia ka aseni amangba Tsüngremi asenok kanga dang meima aser aria bilemja asen lennir kar nem election merüka agitsü atema tangatetba aser shisatsü agütsü. Iba tangatetba tajung nung ammeter küm ishika Nagaland nung election merüka agitsü, kanga dang asüngteta yimsüsür tajungtem shimtsü tesayubatem aser tayongzükbatem agüja arur. Tanü joko ibaji mapa küma inyaktsü mapang ka tonga arudang, na aser ni kong noktaka lir, khen arokaroka shisadangtsüla. Tesüiba ama tan election nunga sen komaser teimba bendentsü, meshizüktsü ta asüba tangatetba nungtosa noktaka lir asü, mesüra tan election nungbo ochishia dang kü indang senti vote ji tetemjen candidate nem angati dang agütsütsü ta asüba tangatetba nung noktaka lir? ‘Nagaland Khrista asoshi’ ta yimyimbo yimjak nung ayimer saka asen lima nungbo temenen moshir. Taruba assembly election ya Tsüngremi asenok tendangba mapang ka asütsü akok aser iba election ajanga asen tarutsü tia yanglutsü. Clean Election tayongzükba aser osangtem asenoki noklangben dena teimba angashiogo aser iba tayongzükba agizüka nisung aikati tenangzükbatema agiogo. Pei bendanger aser mamangertemi Naga nungeri kechi inyaktsü ta tenük yokdar, anungji arungma asenoki Khristan tajung ka ka ama, mulungsentsü temerük agi tetemjen nübotem shimdi, parnok nem angati atema dang asen senti vote agütsüdi aser tangari tatishitsü süa benshitsü atema Nagaland sorkar ketdangsübaren melenshidi. Tamanger ajaki taruba election atema khuret bena sarasademtsüla aser Clean Election ji asangsang nung agitettsü atema Tsüngrem dang nungi teyari aser Pa taochi meshidi.