Election magi tajungba

Yashi Brehostibar nü Kohima nung tang Nagaland nung yimsü tesüdak yimsüsürtem den taoba mapang yimsüsür tejenpurtem telongjem senden ka mena election  magidang Naga yimten tebilemtsü ya tama tatem küma latetmatsüla ta lemtetbaji kanga süoki ia bilemtsüba mapa ka lir. Iba kasa ken o ya tang yimsü tesüdak yimsüsürtemi lemteter Delhi nung oagi center government nem metetdaktsüba sülen, ano yimsüsür tejenpurtem jaoka kasa lemteta akaba ken o renemshiba jagi tang yimsüsürtemi shitakba yimten telemtetba kati maru tashibo election maginer ta sayur.Election maginüba kuli aika rongnung tongtibang kuli kaji, election agili telemtetba kati arunungbo yimsü tesüdakpurtem pei menden nungi anentsüsa akümtsü, anungji election nung rongsen laluba aser belemba amajok asütsü. Ano, tanga kuli kaji election agiyonga Naga yimten telatetba ka dangi marutetra terenlok mapa junga meinyaktettsü, kechiyong tang amai government aika anepalutsüsa akümtsü. Anungji, yimten aser lokti lenirtemi shitakba Nagaland renloknüra tamasa Naga yimten tebilemtsü ya latetmatsüla. Tangbo Naga nunger linük tenzüker telok aika alinungji, telok mashi ka tenüng nung nisung aikati senotsü sarua senzür. Ibaji dang masü saka state government maparen ajak nung linük tenzükertemi amushir. Aiben government mapa nung inyaktsü purtem shimdang aser contract mapa alemdang, kiburbo India kübok aliba Nagaland state government saka tashibo Naga nunger linük tenzükertem-iang amshir ta aiben timtem ajuruba otsü angashir. Iba ama timtem ajuruba jagi balaka terenlok mapa junga meinyakteter. Aji oda, chiaka koya, mechiaka koya ta asüba amato, joko mapa meinyaki senotsü endokba ajak telongpurtem dang atonger. Iba yimya ya manen tashi Nagaland nung terenlok mapa timi inyaka aotsübaji tamakoktsü asütsü. Iba tangatetba nung Naga yimten tebilemtsü ya tama tatem küma latettsüla. Akhidangbo, Nagaland nung India election ya magitsüla ta nokdangaka state government nung alirtemi kangshiasa agi saka tangbo government nung yimsü tesüdak purtemiang election magili asür. Iba jagi Naga nunger yimsüsürtem dangia tangatetba tajung ka aruogo ta bilemer. Shitakba nungbo, Nagaland nung Naga nungertemi election magili asünung, shibaibo kangshia agidaktsütsü, anungji Naga nunger longjemer ‘Election’ masü ‘ Solution’ nüngdaker ta ayimtentsübaji kanga tongtibang kümogo. Iba tangatetba nung yimsüsürtemi tang tashi nung lemteta akaba telemtetbaji ano tatar senden nung benoka jembir külen pangzüng küma latettsü renemba jagi shitakba yimsüsürtemi Naga yimten tebilemtsü ya latetdaktsüner ta angateter. Atangji, Naga yimten tebilemtsü ken o ya India den benoka jembir joko NSCN-IM purtembo küm 20 ajunger aser tang ano tanüngba Naga nunger linük tenzüker telok trok den jembi tenzükogo.  Ano, telok ana anünga lir. Naga nunger linük tenzükertem telok aika süaka nükjidongbo ka dang asünungji, tang parnok telok tenetji külemi mener kasa nübortem aser kasa tarutsü anogotem asoshi India den tajungtiba latettsü merangra, mapang magii yaktasa telemtetba kati arutetla. Iba amaji ka mesüi ano tang election agi nungbo, India nunger election nung Naga nunger linük tenzükertem telok ajaki shilem agitsü aser election-i airtem aikati “Clean election’ tangatetba amadoker sen aser tashiyim amshitsü. Aji oda, election shia yimten telok ajaki Naga yimten tebilemtsü ya yaktasa telemtetba kati arutsüsa inyaktsü ta nangzükli, ano telokang teimba kümli ta aruba yagi Naga nunger tarutsü jenjang kanga mejungi raksatsüogo. Joko, kecha election nunga shinga teloki telongpur mamshitsü aser Naga yimten tebilemtsü akoktsüsa inyaktsü ta-ka menangzüktsü, saka Naga yimten  tebilemtsü mali, Nagaland renloktsü asoshi sademsadema shisalemsateptsü aser inyaktsüsa, atangji, Naga yimten tebilemtsü latetter külenang election agibasa tajungba asütsü.