Election magidaktsünüba ola

Nagaland nung election agidi asünungbo joko anogo ishika tsüngda election agitsüba anogo metetdaktsütsü, anungji election-i aitsü jangrartembo joko nübo yim tenzükogo. Ajisüaka, ano külen Nagaland government nung alir yimsüsürtemi anir lokti tentet ajaki election magidang tamasa Naga yimten tebilemtsü ya tama latetdaktsüner. Iba olaji India government-i kanga süoki ia angatsü nüngdaker. Atangji, election agir government tasen ka tenzüka aotsübajia nübortem asoshi junger, saka tang amai yimten tebilemtsü agi sünger election ka sülen ka ta agia government kümer yimsüsüyonga aotsübaji timtem aika lir. Item timtemji lokti tentettemi center government dangi election khen atema thinena atar yimten telemtetba ka tama bushidi ta mepishia züluba shiditem nung shia lir. Item kulitem rongnung kaji, Nagaland nung linük tenzüker telok balala aika kümogo aser item telok shia government kaka lir, anungji Nagaland ya government aika aliba state ka lir. Ibaji miimshitsü makok. Iba tebilemtsü ya tatembang kati marudaktsütet tashi Nagaland government inyakyim nung timtem teimba-teimba ajuruyonga aotsü. Ibayongji, nübortemi election masü ‘solution’ aginür. Atangji, Naga nunger linük tenzüker telok paika ya lemsar alidak tebilemtsü tatembang ka küma telemtetba kati arutsübaji kanga tasak, ajisüaka akok tashi Naga nunger lokti tentettem ajaki shilem agia merangdang nungbo tamakoktsü agi takoktsü küma inyaktettsü. Tang tashi nung NSCN-IM telokbo taoba küm 20 tashi India government den jembia aruogo aser joko telatetba kati arutsü anasa lir ta angazüker. Iba denji ano yaküm küm Naga nunger linük tenzüker telok trok longjemer India den Naga yimten ken o lapoka jembi tenzükogo. Ano, Naga nunger linük tenzüker telok ana India den ken o jembi metenzüki lir. Item ajakji kodang reprangdangdir, tebenjabo tebenja saka anepalu mesüi odang toktsü nungbo tali tebenjaba aser tebilemtsü tuluba kümadoktsü. Tanü Naga nunger yimten aser lokti lenirtemi item tebilemtsüji tatembang küma lateta toktsütsü asoshi kanga süoki ia inyaktsüla. Iba amajika mesüra tanü asenoki tarutsü lanu putu asoshi toktsüba senmangji yimten tebilemtsü dang tuluka toktsür asütsü. Iba tangatetba nung election agitsüba dang nungibo Naga yimten tebilemtsü akoktsübaji tongtibangba ta bilema Naga nunger ajaki inyaktsübaji kanga nüngdaka kümogo. Ashiko, Naga nunger lokti tentettemi magidaktsünüaka election ya agitsüa akok. Iba ama tensa mapang ka nung election nung shilem agitsüba magitsübaji Naga nunger mulung asütsü. Atangji, election agiyonga Naga yimten telemtetba kati marutettsü ta masü, anungji tejembitsü purtemi maneni jembitsüla. Election agi magi ta masü saka Naga yimten telemtetba kati arutsübajibo Naga nunger linük tenzüker teloktem ajak külemi senden ka nung mener shisalemsateptettsüla. Nükjidongbo ka dang aser India government den dang jembir saka telok shia mapang balala aser tesem balala nung jembi tashibo telemtetba kati marutettsü. Naga nunger yimten telok balala süaka yimten ken o lemteptsüba lenjembo ka dang asünungji, telok balala süaka India government denbo külemi jembitsüla. Iba tangatetba nung Nagaland government nung yimsüsürtem aser lokti tentet lenirtemi maneni inyakra memenui Naga yimten tebilemtsü ya tatembang ka küma jembitettsü imlar. Tang asenoki koda election agitsüba dang nungibo Naga yimten tebilemtsü latettsüba ya-ang tongtibangba ta bilemer, yamaji election agiaka magiaka Naga senso ajaki Naga yimten tebilemtsü latettsüba ya pei khuret ama bilema inyaktsüla. Iba ama mapa nung, anibelem timtem aika liaka, ano maneni FNR telok ama kati tangatetba tenla agüja len anitsü atema  ajungshir.