Election timi agitsü imlar

Nagaland nung ajaki aginübaji election timi aginür. Iba jagi arogo aser lokti balalai election nung tai memenai timi shilem agitsü asoshi maneni jembia arudagi. Atangji, election timi agitsü jembiba ya election-i aiertem asoshisa tajungba, kechiyong sen meindoki electioni aitsü aser adokra pei asoshi kecha mebilemi jangratema pei lima aser nübortem tenzüktsü. Ano, nübortema pei temeten shitak meraketa yutet nungji election temer külensa aküm taketba küma lokti aser yimten nung shilem agitettsü. Iba ama tarutsü nükla tajung yur nübortem ajaki akok tashi tangbo kodang election arudir timi ochishia shilem agitsü jangraba reprangtetter. Iba tangatetba nung Mangkolemba town nung alir sensosanger ajaki mulungsua taruba election nungbo Tsüngrem tenüng nung ochishia shilem agitsü asoshi telemtetba agibaji parnok asoshi dang masü saka tangar asoshia tayongzükba tuluka asütsü. Ano, Longsa Watsü Telenia yimtaki tememsepba chiyongtsü bener marudaktsütsü aser Longsatsür ajaki pei temeten tasü itta  wazüka ayuba den senti vote ochishia agütsütsü telemtetba agiba osang kisüng metetdaktsüba jagi taruba election-bo timi agitsü nübortemi mulungtetba kuli ka angur. Mangkolemba sensosangertem aser Longsa watsü Teleni agiba telemtetba amaji town aser yimtsüng ajak nung agiyonga ao nungbo election mapang nung kecha timtem melii nübortemi mulungba yimsüsür shimtettettsü. Mangkolemba nung alirtemi ashiba amato, aiben town aser yimtak yimtsüng nung election nung tokteper telok balala kimen mesemteta yur yangji lanurtem chiajema kazüdaktsüba agi takoksa aser lendong aika ataloker. Itemji nokdangtetra election nung timtem adokdak tesem samadaktsür asütsü. Ano, Mangkolemba nung alirtemisa election mapang candidate-temi yimten aser arogo nem tenla agütsüyonga magizüktsü ta lemtetba telemtetba jagi parnok dak tangatetba tulu lir ta sayur. Asen lima nung election timi agitsü asoshi telemtetbatem agiba ya kari kangshia agidaktsür masü saka peisasa pei tangatetba yari agir. Aji oda, Mangkolemba sensosanger aser Longsa Watsülartemi agiba amaji peisasa town aser yimtsüng shia nung yimten aser arogoi telemtetba agi meshiogo. Atangji, yimtsüng kar nungbo Clean election flag asong tenzükogo aser aikati tenangzükba kaket nung sign süadokogo. Ajisüaka, ano aika terata nung lir aser ano karbo kechisüdirsüaka election nung sen aser tashiyim amshitsü ta asüba tangatetba nung lir. Iba jagi arogo aser lokti balalai clean election atema tejembidak nung candidate karibo sen agi vote alitsü merangba aser ano tesem kar nungbo tashiyim amshiba osanga angashir. Atangji, election timi agidi ta ayimoktsüliyongi hai ta ajakibo magizüktettsü, kechiyong asenok dak election mapang yimyasübaba jakla aika lir. Ajisüaka, meshitakertem dang nungibo shitak inyakner teimba süra, tamajungji tajungi akoktsü. Election timi agitsü jembiba ya temenen anema jembir asünungji shi azü den melangtepba tongpang ka masü saka tanüla tongpang lir, anungji town aser yimtsüng ajak nung joko tang yabo pastor-i anir village council aser watsü telen nung lenirtemi ni aser ozü kibongbo election nung ochishia shilem agitsü, anungji nenoka koda (?)  ta Mangkolemba sensosanger aser Longsa Watsülartemi renemba amaji pei yimtsüng aser arogo nung telemtetba agitsü mapang tongogo. Ibai Election ya junga agitettsü asü magitettsü ta rataba mapang masü saka timi junga agitettsü asoshi joko mapa tenzükadokogo.