Eritrea nung mitkartemi longkak aiter nisung 28 tepset

Asmara, November 02 (Agencies): Eritrea yimtiba Asmara nung mitkartemi longkak aiter nisung 28 tepset, ta opposition teloki ashi aser iba ajanga linük nung nisung meimchir temeden indang tebilemtsü tali adoker.
Asmara nung Mongulbarnü nisungtem longkak aitba ajanga Eritrea nung aliba US embassy nungia lendong nungi kümzüka alitsü asoshi osang sangdong, aser longkak aitba tesem nungi nüburtem bila alitsü ajungshi.
“Iba ama azüdokshi mapa ajanga nisung 28 taküm samatsü aser 100 yirutsü … international community aser human rights teloktemi arua iba mapa tamajung nung densemertem nem obendang agütsütsü asoshi ajungshir,” ta Eritrea nung opposition Red Sea Afar Democratic Organization ajanga Facebook nung zülutsü.
Islamic school ka nung kaketshirtemi tekolak nung sü indokba (headscarf) aser tamangba yimsü dak sendakba tesayuba tem sorkari tenokdangba agütsüba sülen iba longkak aitba ya Mongulbarnü nungi tenzük, ta longkak aiter temi osangbener dang ashi.
Iba lendong ya Muslim nunger timba sür aliba Akriya tesem nung adalok aser iba tesem nung kaketshir 3,000 aliba indang Diaa Islamic School of Asmara lir.
Eritrea nung nüburtem longkak aitba ya aiben malir aser iba linük nung nisung meimchir temeden anema inyaker, ta aitsür.
Tir Isaias Afwerki ajanga iba linük nung 1993 küm nungi yimsü süa arur.
Iba longkak aitba nung kaketshir aika aden aser meilongi nisung timba aküm.
US embassy-ibo nisung asüba osang ya mashi.
“1960 mapang lapokba Al Diaa Islamic School ya sorkari rakzüktsü merang,” ta meimchir temeden asoshi nokdaker aser Sweden nung alir Meron Estefanos-i osangbener dang ashi.
“Iba tensa ya sorkari Al Diaa School indang honourary president Haj Mussa apuba ajanga tenzük,” ta Estefanos-i ashi.
Iba mangatettep nung kaketshirtemi mitkartem dak long agi aon aser parnok dak mitkartemi azük, ta lai ashi.
“Mapang talangka melie iba rally ya Asmara tiyong nung aliba yimdongi prokshia ao aser iba mapang mitkartemi longkak aitertem senshidaktsütsü mechi tashiyim amshi,” ta laisa ashi.
“Eritrea nung mapang talangka nüburtemi timtem aika aremzüka aruogo aser tang mapang ya parnok temeden asoshi nokdakba mapang lir,” ta Estefanos-isa shisem.
Saka iba osang ya tiazü lir, ta Eritrea indang information minister Yemane G Meskel-i ashi.
“Asmara nung kaket reju ka nungi longkak aiter telok tila ka ajanga nisung taküm samaba meliaka osang yanglur,” ta Meskel-i Twitter nung zülutsü.
Eritrea linük ya Ethiopia, Sudan aser Djibouti linüktem den arr lir aser North Korea nung ama iba linük nung ‘freedom of expression’ aiben mamshiteter.
“Iba ya ozüng tesashi amshiba lir, aser maneni Eritrea nüburtem amokbanga parnok temeden ajunga shibangtsüba maparen ka lir,” ta London nung alir activist Selam Kidane-ia osangbener dang ashi.
Eritrea nung kuli kicha melie nisungtem apur, osang ola kicha magidaktsüi tepuokdak ayur aser national service system ajanga alar ama amshir, ta Eritrea nung UN Special Rapporteur Sheila B Keetharuth-i taküm June ita shia liasü.