EU-i teyari sen billion 2.4 agütsütsü onük agizüker

Brussels, August 10 (Agencies): European Union (EU) kübok tentetba European Commission (EC)-i teyari sen billion 2.4 agütsütsü onük ka tanü Hombar nü agizükogo.

Greece aser Italy na densema pei linük toktsür Europe nung jenoka alitsü asoshi bendang sensotem aruba khuret benoka aliba Europe nung tentetba linüktem yaritsü nükjidong nung EC-i teyari sen agütsütsüji renemer lir.

Tan agütsütsü renemba teyari sen nungi Italy nem timba, euro sen million 560 agütsütsü aser Greece nem sen million 473 agüja yaritsü renemogo.

Middle East aser Africa na nung alir meyirijang jenti pei linük toktsür Europe nung jenoka alitsü nükjidong nung Europe bushia aruba ajanga Europe kübok tentetba linük sorkartemi tang timtem khuret tulu benoka lir.

Tan August ita kisüng nunga ozüng alema Europe nung jenoktsü merangertemi Eurotunnel ajanga France nungi Calais-i aotsü merangdang nisung jenti asüba osang bushiteta lir.

Aji oda, tan agütsütsü renemba teyari sen shilem kar tang Calais den sentakba timtem ajurua aliba France aser Britain sorkar na nema agütsütsü lemteta lir.

“France-i tenzüka aliba ozüng alema pei linük toktsür par linük jenoktsü asoshi arurtem yaritsü mapatong den yariteptsü asoshi EU-i tan lemtetogo. Britain-i tenzükba mapatonga dena taoba mapang yariogo,” ta EC otongdar, Natasha Berthaud-i metetdaktsü.

You must be logged in to post a comment Login