Facebook-i NGO tem atema ”Donate Now” sayaogo

New York, August 25 (Agencies): Tang nungibo Facebook amshirtem ajaki tajangzük mebushiba tentettem tapak ajak nung ‘Donate’ button ka ka angutsü, ta Techcrunch.com ajanga metetdaktsüogo.
“Nüburtemi kechisarena metetpelatsü asoshi anogo shia Facebook amshir. Pei-i junger ta bilemba aser puasemba temetettsütem ajak Facebook ajanga lemsateper koba ajanga ibaji angur aser züngshirtem ajungmesodaktsür,” ta Facebook otongdari ashi.
Pai, “Yamaji asüba ajanga tajung jenti inyaktetba angudang onoka kanga ajungmesor, anungji Facebook nung aliba tajangzük mebushiba tentettem page aser ad link tem nung onoki ‘Donate Now’ button enoktsüogo koba ajanga tesendaktep ano tali tajungba aser temelaba akümtsü,” ta shisem.
2013 küma Facebook-i American Cancer Society aser Red Cross atema “Donate” button ka enokja liasü.
Tajangzük mebushiba American Cancer Society aser Red Cross tentettem den yariteptsü asoshi iba button nung nemer credit card ajanga tenla agütsüteta liasü.
Ajisüaka, tangbo nai kodang ‘Donate Button’ nungji nemdir, ‘iba NGO ya Facebook den kecha tesendaktep mali, ta adoktsü aser iba sülenji tapak tanga ka pa sasa lapoktsü. Iba tapak tasenba ajanga dang tenla ajak agütsütettsü.

You must be logged in to post a comment Login