FB CEO Mark Zuckerberg memunoi tebu akümtsü

August 01, 2015: Facebook nguteter parnok pongu rongnung züngsem ka, Mark Zuckerberg, shiba tang Facebook nung Chairman aser Chief executive lir, pa kinüngtsü Priscilla tena mapang talangka tanur benlokaka magishii aruba sülen tan tetsür ka benloka lir, ta Hokolbar nü metetdaktsüogo.
“Küna tanur tetsür ka benloka lir! ta Zuckerberg-i par facebook ajanga lemsatepogo.
“Cilla aser tanur naprong temang nung timtem kecha mali, ni la ajurutsü asoshi kanga yongyar saka ozü azü, Beast-i bo kechi atalok’ar kecha memetet,” ta Facebook ajangasa lemsatepogo.
“Ultrasound agiba mapang lai temeyong tuluba sayu,” ta paisa ashi.
Zuckerberg-i tesüiba küm ana nung asemben tashi tanur magishii intokogo aser tebutsü tena tanur kanga aginüa liasü, ta lemsatepba mapang pai, ni kechiba ya lemsateper süra iba ya ajanga temulung ajemer teimla malirtem-a temulung ulushitsü atema lemsateper, ta shisem.
“Nisung aikati tanur benloker magishii pasasa raksaba otsü melemsatepner, kechiba süra pei sasa pei dak langka tai lir amai asenoki bilemer mesüra asenoki langka tai inyakba ajanga tanurji raksa amai bilemer. Anungji kija kanga timtemteper,” ta paisa ashi.
Cilla ya doctor ka lir aser la den külemi alima nung nüburtem asoshi inyakba nung yariteptsü. Joko kenati alima ya ajak asoshi aser ozü jala asoshi tajungba kümdaktsüba maparen nung temulung agüja inyaktsü, ta Zuckerberg-i lemsatepogo.