FBI Director dang pa menden tokjang ta rongshir

Parkland, Florida Tsüklai 17 (Agencies) : Florida high school nung nisung 17 tepsetba atema shiba aija lir, pa ka ket nung prangpong bena lir aser pai nisung tepsettsü jangrar südi ta FBI dang tekümdangtsü
osang metetdakjaka bushisüngdang masü ta parnoki metetdaktsüogo; iba tamakok nungji ajemdaker tang FBI director mapa nungi anenang ta kanga sashia rongshidagi.
Parnoki ibaji sangdongba sülen iba tashiyim lendong atalokdak, Miami suburb, Parkland nung aliba nüburtem kanga jashir aser tang Florida governor, Rick Scott-i FBI chief Christopher Wray dang pa menden tokjang ta shiogo.
“Jelia tekümdangtsü osang metetdakjaka FBI-i teinyaktsü maparen meinyakbaji magizükteter,” ta Scott-i metetdaktsü.
Aibelensang Nikolas Cruz (küm 19) den tembar ta shia nisung kati Aenjeti 5 nü FBI nem tekümdangtsü osangji metetdaktsür liasü; ibaji Marjory Stoneman Douglas High School nung tashiyim lendong matalokdang hopta ishika jelia ashiba liasü, ta Federal Bureau of Investigation ajanga sangdongba sülen tang Scott-i iba osang metetdaktsü.
Ano tanga osang ka nung ashiba agi, Nikolas Cruz shibai kaketshir 15 den staff ana densema AR-15 automatic rifle agi kaset, pai police den jembidang ashiba agi, tashiyim mapaji koma inyaka aotsüar pa dang tekolak nung ola kar ajanga ashi.
Cruz-i angashiba olaji ‘temenen’ ola liasü südi, ta police-i ashiba olen ka ABC News channel ajanga sangdongogo.