Federer temaba jenjang tongteter rongnung tambusang kümogo

Rotterdam, Tsüklai 17 (Agencies): Rogonü (Friday), Rotterdam Open tebur tennis asaya nung semi-finals tongtetba sülen Grand Slam title 20 tashi bena alisang Roger Federer tebur tennis asayar world no.1 tongteter rongnung tambusang kümogo.
Arishi küm 36 tain, Switzerland nunger Federer-i, quarter-final asaya nung Netherland nunger Robin Haase madak 4-6, 6-1, 6-1 agi takok ngua liasü.
“Ni kanga pelar. Ni iba jenjang tongtettsü atema bilema meliasü. Asaya aruba nung iba mapang ya kü career nung kanga tongtibang mapang ka lir,” ta pai ashi.
2003 küm Agassi-i, pa arishi küm 33 aser anogo 131buba asüdang world no.1 jenjang nguteta asayartem rongnung tambusang aliba, Federer-i tang ajatetogo.
Federer nem tenüngsang agütsür rongnung Agassi-a mezüngpur rongnung densema liasü.
“Küm 36 aser anogo 195……@rogerfederer nai maneni iba asaya ajungketjang. Nai takok tulu ngutetba atema tenüngsang agütsür!!,” ta America nunger temi, tweet asü.
Ita 13 tsüngda nung, Federer-i Aenjeti Australia Open asayamung nung takok anguba den külem asayamung tongtibang asem tashi nung takok ngua pa tang form kanga junga lir. Maneni, mezüng set asaya nung, Haase-i tashi ajak agi Federer den asaya set akok saka tanüngba set ana nung, Federer-i tajungba asayateta, pa den toktepsang madak takok angu.
Federer-i, iba jenjang tongtettaka, pa ano Küptoknü semi-final asayatsü lir.
Iba asayamung nungsa, tanabuba seed nung alisang Grigor Dimitrov-i, Russia nunger asayar tasen, Andrey Rublev madak 6-3, 6-4 agi takok ngua semi-final tongtetogo.