FIFA best player award atema Ronaldo, Messi & Neymar shimtetogo

New Delhi, September 22 (Agencies): FIFA best player award atema Cristiano Ronaldo, Lionel Messi aser Neymar nungertem tatemsa shimtetogo.
Ajisüaka, FIFA best player award osangji October 23, 2017 nü London nungang metetdaktsütsü.
Brazil nunger asayar mongin Neymar (25)-i taoba season Barcelona den Copa del Rey akok aser iba sülen Paris Saint-Germain nung aden. PSG-i Neymar sen 222 million euros ($266 million) agi alizüka world transfer record ka yanglua liasü.
Taoba season Real Madrid-i La Liga title aser Champions League tasembuba anguba nung arishi 32 tain Ronaldo-i shilem tajung agiogo.
Yaküm Real Madrid den Champions League aser Portugal den European Championship akokba ajanga Ronaldo-i FIFA best player award nguteta liasü.
Ronaldo-isa 2008 küm FIFA World Player of the Year award angu aser Ballon d’Or pezüben tashi agizükogo.
Arishi küm 30 tain Messi-i taoba season nung goal 54 tashi agütsü aser Barcelona-i Copa del Rey o Spanish Super Cup takoktem angu. Messi-i Ballon d’Or ponguben tashi ngutetogo aser tan season nunga pia asaya 8 nung goal 12 tashi agütsüogo.