Four Nations Hockey asayamung nung India-i Belgium akok

Hamilton, Aenjeti 25 (Agencies): Yangtepnü (Thursday) Gallagher nung tebur Four Nations Invitational hockey asayamung tanabuba leg nung India-i Olympic silver medal angur Belgium madak 5-4 agi akok.
Iba asaya nung India team nungi asayar Rupinder Pal Singh-i minute 4 aser 42buba, Harmanpreet Singh-i minute 46buba, Lalit Upadhyay-i minute 53buba aser Dilpreet Singh-i minute 59buba nung goal idaktsü. Kasa asaya nung Belgium telok nungia John-John Dohmen-i minute 17buba , Felix Denayer-i minute 37buba, Alexander Hendrickx-i minute 45buba aser Tom Boon-i minute 56buba nung goal idaktsü.
India team-i ‘two-touch’ tasa amshia ball amshia asaya tenzükba sülen Vivek Sagar Prasad-i ball kera bener aluba mapang, Belgium Defender kati aibelen, aser iba yongji India-i mezüng penalty corner angu. Rupinder-i mezüngbuba goal ya agütsü.
Second quarter asaya tenzuker Belgium nungeri India defence nem aiben timtem agütsü. John-John Dohmen-i India nunger Varun Kumar nokdaka aliba ajanga ball bener lua par telok atema mezüngbuba goal agütsü.
Minute 24buba nung Tom Boon-i par Belgium team atema penalty corner ka ngua goal inoktsütsü merang, saka goalkeeper P.R. Sreejesh-i kanga junga nokdang.
Tasembuba quarter asaya nung Belgium-i minute 37buba nung penalty corner ka angu aser iba corner nung Felix-i Belgium atema tanabuba goal agütsü.
Minute ishika lir Belgium nunger defence nung asayartemi meshidak asayaba ngua India team-i penalty corner ka minute 42buba nung ngutet aser iba corner nung Rupinder-i goal agüja telok ana tsüngda goal 2-2 aküm.
India nunger tsütsü defence nung kanga kümdanga liaka parnoki Belgium forward menokdangteti tasembuba quarter tembangtsü second 43 anünga alidang India-i penalty corner ka agütsü aser iba corner nung ball ya Sreejesh-i save süaka Belgium nunger Dohmen-i rakzüker Alexander Hendrickx nem agütsü aser pai iba goal yoka 3-2 agi par telok temaba nung asembuba quarter tembang.
Tatembuba quarter tenzüker külen India-i penalty corner ka ngua Rupinder-isa ball zükloktsüba mapang Belgium goalkeeper-i nokdang saka pa dak ball tsükdaker meyiba adoka Harmanpreet Singh-i aibelen mesüi goal idaktsü, aser telok ana tsüngda goal 3-3 aküm.
Asaya tenzüker minute 53buba nung Vivek Prasad-i Belgium nunger defence ajanga ball kanga junga bener lua Lalit nem aguja pai-a India atema goal ka agütsü.
Asaya tembangtsü minute 5 lia India nungeri aibelenbayong Belgium-i penalty corner ngua, Tom Boon-ia goal ka yoka telok ana tsüngda goal 4-4 aküm.
India nunger Ramandeep Singh-i Belgium defence alema ball bener lua goal post leni zukloktsüba nung Dilpreet Singh-i agizuka India team atema goal pongububa yokteta Belgium madak 5-4 agi takok ngutet.