G-7 lenirtemi tsüngsang mupong melenshiba onük benoker – 9th June

Elmau, June 08 (Agencies) : Germany nung amenba G-7 senden nung shilem agirtemi Tsüngsang mupong melenshiba, kiralongrartemi lendong tsüdong atalokdaktsüba aser Ebola tashidak densema alimai tang ajurushia aliba khuret balala den sentakba onük benoka tanü Hombar nü jembiba osang jangjaogo.
Alima tali tatsükba küma tsüngsang mupong balalaka küma meleshidaktsüba ajemtsütsü nükjidong nung Germany Chancellor, Angela Merkel-i carbon aketba totzü ajema benshitsü onük tanü senden nung benok.
Ano, tsüngsang mupong melenshiba ajanga bener arutsüba timtem balala nung amshitsü asoshi sensaka aliba linük tenem US nunger dollar sen billion 100 tashi agütsütsü onüka lai benoka liasü.
Russia linük yaküm par züngsemnungi agienba sülen G-8 nungi G-7 küma tenüng melenshiba teloki bendanglen tentetba telok aser tang terenlok ngua aliba linüktem nungi o jembir jaoka par senden nung shilem agidaktsütsü telemtetba ka tanü agiba osanga jangjaogo.
United Nations (UN) Secretary General, Ban Kimoon aserWorld Bank Tir, Jim Yong Kim natia tanü senden nung alima tesem balala nung sensakba tia aser tashikdak balala agientsü asoshi mapatong tenzükba osang lemsatepogo.
Iraq-i Islamic State (IS) ta ajaba kiralongrar telok anema raraba den sentakba osang ka Iraq Ato Kilonser, Haider al-Abadi-ia tanü senden nung metetdakja liasü.
G7 lenirtem aser G7 senden anemba longkak aitertemi tanüa Garmisch-Partenkirchen yimti nung longkak aittsü sentong ayonga agiba osanga jangjaogo.

You must be logged in to post a comment Login