Gauri Lankesh tepsetertem noksa sayaogo

Bengaluru, October 14 (Agencies): Karnataka yimtiba, Bengaluru nung journalist, Gauri Lankesh khasetba sülen ita ka ser anogo 10nüba nung Hokolbarnü Special Investigation Team (SIT)-i la tepsetba ken o nung melung melemteti alir nisung ana noksa sayaogo.
Gauri ya September 5, 2017 aonung lar kima mejangjaba nisung kari khaseta liasü.
Iba ken o nung tang mezüng osangbenertem den jembidang SIT tongti, BK Singh-i, Lankesh tepsetba ken o nung tenük kuli alir ka lir, ta metetdaktsü.
Singh-i, “Technical team aser iba tesem nung alirtemi ashiba nung ajemdaker onoki melung malemba nisung ana indang noksa asem yanglua lir. Lankesh metepsetdang parnok tajemba agia hopta kabo Bengaluru nung mongogo aser iba mapang nung parnoki lar ki-a itangita reprangogo,” ta metetdaktsü.
Nüburtem dang teyari meshia Singh-i, “Nisung kari danga noksa nung aliba tejak mesüka ngura onok nem metetdakjang,” ta ashi.
SIT-isa melung melemteti aliba nisung ka tola temesüng semer motorbike nung sanger aoba noksa ka sayaogo. SIT-i melung melemteti aliba nisung anaprongji arishi küm 25 nungi 35 tsüngda asütsü südi aser tangbo Bengaluru nung mali, ta bilemer.
Ajisüaka Singh-i, noksa dakji alia melung melemteti aliba nisung ana indang dak sendakba osangtembo tang tashi mebushitet, ta ashi.
Paisa, CCTV cameras nungi parnoki 75TB noksa aiben reprangdanogo, ta ashi.
Ano külen SIT tongti, DCP (West) MN Anucheth-i, “Bushisüngdangba mapang nung onoki artificial intelligence softwares aika amshiogo, saka tang-tangbo onoki parnok tenüng aser tanga osangtem memetetdaktsütsü,” ta ashi.