Gold Cup: Mexico-i Cuba akok; Trinidad-i Guatemala tsükdaktsü

Chicago, July 10 (Agencies): Mexico teloki Cuba madak aser Trinidad & Tobago teloki Guatemala madak takok ngua tang tasayadak CONCACAF Gold Cup asayamong nung yashi Brehostibar nü shilem agiogo.
Striker Oribe Peralta-i hat-trick yangluba densema par Mexico teloki goal 6-0 agi Cuba madak takok ngua liasü.
Peralta-i goal 2 aser Carlos Vela o Andres Guardado nati goal ka ka agütsüba densema taoba mapang nung Gold Cup takok marok 6 ben tashi agizükba telok, Mexico-i yashi asaya mezüngbuba shilem nung goal 4-0 agüja Cuba madak temaba jenjang nung asaya.
Tesülen, asaya tanabuba shilem nung, asaya tenzüker minute 61 buba nung Peralta-i tasembuba goal agüja hat-trick yanglu aser pa sülen anidaka, Giovani Dos Santos-i par Mexico telok asoshi 6 buba aser takokba goal agütsü.
Mexico-i par taruba asaya Trinidad telok den asayatsü lemzüka lir.
Ano külen, Trinidad telokia yashi asaya tenzüker minute 25 buba tashi nung goal 3 tashi agüja Guatemala den temaba jenjang nung shilem agia liasü.
Asaya tenzüker minute 11 buba nung Sheldon Bateau-i mezüngbuba goal agütsü aser pa sülen anidaka, Cordell Cato-ia minute 14 buba nung par Trinidad telok asoshi tanabuba goal agütsü.
Joevin Jones-i goal ka agüja par Trinidad goal 3-0 agi temaba jenjang ngudaktsü.
Tesülen, asaya tanabuba shilem nung Carlos Ruiz-ia par Guatemala telok asoshi goal ka agütsü saka par teloki tamakok ajurua liasü.
Küm 2 nung ken asayaba Gold Cup asayamong ya North & Central America aser Caribbean nung densemba linüktemi shilem agiba tongti regional championship ka lir.