Google kibur indang temaba menden nungi Eric Schmidt alutsü

California, December 22 (Agencies): Google kibur, Alphabet nung executive chairman, Eric Schmidt ya January ita menden nungi alutsü, ta company ajanga sangdong.
Eric Schmidt ya iba company nung 2001 nungi liasü, aser pa ya science & technology indang board nung technical adviser ka ama alitsü.
California nung start-up tila ka nungi alima nung shishilembar tulu küma aoba Google company renlokba nung Schmidt-i shilem tajung agia lir.
Pa melena non-executive chairman ka shimtsü imlar, ta Alphabet ajanga ashi.
Alphabet nung temelenshi arutsü asoshi mapang tetemsü lir, ta Schmidt-i shia liasü.
Ni science & technology issue aser philanthropy nung mapang aika indokogo aser iba mapa tuluba kümdaktsütsü, ta pai shisema lir.
Google ya 1998 küm internet search company ka ama Larry Page aser Sergey Brin nati tenzük.
Schmidt ya iba company nung chief executive ka ama 2001 nung shim aser 2011 nung mendenpuba aküm.
2015 küm Google ya yanglushia ‘parent company’ tasenba nem Alphabet nüngja agütsü aser Schmidt ya mendenpuba shim.
Alima ajunga nung Alphabet den mapa inyaker nisung 70,000 dak tali lir, aser Google Search, Maps, Ads, Gmail, Android, Chrome aser YouTube nung kibur lir.

You must be logged in to post a comment Login