Guwahati nung Dr. T. Ao nem akhüm agutsü; Dmr nung Dr. T. Ao Football academy lapoktsü: NEC

Guwahati, Aenjeti 28: SAI Stadium, Guwahati nung Amungnü Assam governor professor Jagdish Mukhi, NEC Secretary Ram Muivah aser tangartemib football asayar tejen, Dr T Ao indang postage stamp sayaba mapang tangokba noksa nung angur.

Guwahati, Aenjeti 28 (TYO): Northeast nungi football asayar nüngtugu, Dr Talimeren Ao (Dr T. Ao) sor küm 100 ajungba anogomong nung tanü Guwahati nung Assam Angh, Prof Jagdish Mukhi-i pa nüngtem nung Indian Postage Stamp ka sayatsüogo.
Dr T Ao Birth Centenary Celebration Committee-i Guwahati nung pa nem akhüm tapet agütsü. Iba dak alia tanü North Eastern Council (NEC)-i, Tata Trust den senteper Dimapur nung Dr. T Ao Football Academy ka amenoktsü, ta sangdongogo.
Iba sentong nung jembidang Assam Angh, Mukhi-i Centenary Celebration Committee-i Assam aser Northeast atema konang nüngsang bener arutsüsang bilemteta akhüm agutsüba atema pelaba metetdaktsü.
Prof Mukhi-i, Dr T. Ao leniba nung 1948 küm Olympics nung Indian football team-i shilem agiba sülen pai Assam nunga football asaya nüngtugu kümdaktsü, ta metetdaktsü.
Paisa, Dr T Ao-i Assam nung football asaya ajungkettsübaji ajaki bilemteter, aser iba ya mongin nem tapet akhüm agütsüba lir, ta ashi.
Assam Angh-isa Dr T Ao indang noksa aser postage stamp ka saya.
Kasa sentong nungsa North East Council Secretary, Ram Muivah-i, Dr T. Ao asoba benjungmong nung inyaksemba atema NEC nüma atanger, ta metetdaktsü.
Paisa, NEC-i Tata Trust den senteper Dimapur nung Dr T Ao Football Academy ka amenoktsü, ta metetdaktsü.
Muivah-isa, Dr T Ao sor küm 100 ajungba nüngtem nungsa Under-21 football tournament ka Tsüklai (February) 23 nungi tenzüka asayatsü, aser iba tournament ji küm shia asayatsü atema bilema atatsü, ta metetdaktsü.
Sentong nungsa Post Master General of Northeast, Arundhati Ghosh-i, football asayar nüngtugu Dr. T. Ao nem akhüm agüja Postal Department-i postage stamp ka sayaba atema nüma atanger, ta metetdaktsü.
Tanep iba sentong nung Dr T Ao Birth Centenary Celebration Committee Tir, Swapnil Baruah-i, nisung kati tajungtiba ajangzüktsü atema melungtetra, tetsükdaktsü kecha agia ibaji menokdangtettsü, ta Dr T Ao-i, kuli sayuogo, ta ashi.