Heel tsüngsem asemba ajanga timtem anasü kümogo

Washington, July 31: Heel talang keta aliba tsüngsem asemertemi iba yimyaji toktsü nung ajungtsü kechiba süra küm ter tsüngda nung iba tsüngsem asemba ajanga yiruba anasü agi tali kümogo.
University of Alabama, Birmingham nung bushisüngdangertemi ashiba agi, 2002 nungi 2012 tashi nung heel aketba tsüngsem asemba ajanga yiruyipong buluba kanga züina kümogo anungji tesem aser mapang meteta asem nungbo ajak atema tajung asütsü.
Iba bushisüngdang nung lenir, Tatong Tir aser Professor Gerald McGwin, PhD-i ashiba agi, heel aketba tsüngsemji jaksatsü atema kanga junger, ajisüaka temang anema aliyim tsütsü nungi reprangdangra iba yagi timtem bena arutsür.
Iba tsüngsem ajanga tetsüng teküpoklen, teloktep aser temopu kanga sadema marakzüdaktsür aser heel aketba tsüngsem onsara tali asemba ajanga tetsüng teloktep nung aliba shi tetsülong tashi mait kümdaktsür koba ajanga junga mera moteter aser temang azüoka mejajateter.
Bushisüngdang aika ajanga heel talang aliba tsüngsem asemba agi tetsüng nung aliba teloktep aser tezü-tera nung tesülen timtem tulu bener arutsür aser jajaba nung timtem agütsütsü, ta tuteta sayuogo.
Bushisüngdang mapang McGwin-i aniba bushisüngdangertem 2002 nungi 2012 tashi nung heel talang aliba tsüngsem asemba ajanga yiruba data repranga liasü. Iba data nung nisung 123,355 tashi heel talang asemdang yiruba liasü. Teyirur timba ka 2011 küm liasü. Iba küm nisung 19,000 tashi heel talang asemba agi yiruba nguteta liasü.
Iba yiruba nung temesüng tsür dang nungibo tanak tsür anasü agi timba yiruba nguteta liasü.