Nagaland ajunga ‘disturbed area’ ta küm ka atsülangshir

New Delhi, July 08 (TYO) : Union Home Ministry-i June 30, 2015 nungi tenzüker küm ka atema Nagaland ajunga “disturbed area” ta mapang atsülangba sangdongogo.
Nagaland ajungalen tensa majung aser lendong ataloktsü ana nung lir, anungji civil tashi yaritsü atema armed forces amshitsü nüngdak ta Centre-i bilemer, ta Home Ministry sangdong ka nung metetdaktsüogo.
Armed Forces (Special Powers) Act, 1958 nung Arla 3 kübok Nagaland ajunga “disturbed area” ta züngokba ajanga armed forces-i temelaba maliyonga nisung bushitsü, mittsü aser aputsü tashi agütsür. Ano iba ya ajanga Army temi ‘disturbed’ area ka nung law & order anema inyaker ka tepsettsü tashi agütsür.
2005 nungi Nagaland sorkari state nung telungpur dak sendakba tatalokba mesüra tasübatem mali ta kuli agüja ‘disturbed’ area agientsü atema asüngdanga arur.
Naga nunger telungpur telok NSCN(Khaplang) puri Manipur nung Army 18 tepsetba sülen ita ka shi lir Nagaland ji ‘disturbed area’ ta sangoktsüogo.
Ano MHA osang ka ajanga ashiba agi, Cabinet Committee on Security (CCS)-i National Socialist Council of Nagaland- Khaplang (NSCN-K) atema telemtetba ka magidang Ministry of Home Affairs (MHA)-i teinyaktsü sentong ka atongang, ta Ato kilonser Narendra Modi-i tetuyuba agütsüogo.
June ita parnoki NSCN(K) ji Unlawful Activities Prevention Act (UAPA) kübok mokdangang ta ashiba onük CCS-i ano benoka mejembi, ta MHA ketdangsertemi ashi.
Ato kilonseri NSCN-K anema inyaktsü asoshi olemtep kanür aser sentong atongdaktsünür, ta MHA ketdangsertemisa shisem.