Home ministry-i NSCN-IM züngsemtem anioknür

New Delhi, Tsüklai 12 (Agencies): Centre aser NSCN-IM tsüngda special auxiliary regiment mesüra India Reserve Battalion (IRB) mesüka armed police force ka tentettsü tebilemba lemsatepogo ta Union home ministry ketdangser kati ashi.
2015 küm Centre sorkari NSCN-IM den Framework Agreement ka agia liasü saka tanü tashi sorkari iba Agreement nung keta aliba onüktem yimjak nung memetdaktsüi lir. Ajisüaka, ministry of home affairs (MHA) nung ketdangser kati ashiba agi Centre aser NSCN-IM tsüngda telungpurtem indang unit tasen ka tentettsü aser ibaji India sorkar kübok inyaksangshitsü indang tebilemba ka lemsatep.
“Naga yimten tebilemtsü ya tiptema angatetteptsü atema sorkari bilemer aser state azükarutsü atema India sorkar kübok telungpurtem indang force ka tentetnür” ta ketdangserisa shisem.
NSCN-IM züngsemtem indang unit ka tenzüktsübaji tatembang telemtetba ka agitsü atema mapa inyakba nung shilem ka asütsü akok, ta taoba Home Secretary, GK Pillai-ia ashi.
“Tesüiba mapang onoki Naga nunger telungpur temai adokertem dena BSF battalion ana tashi tentet. Kasaji Maoist tem aliba tesemtem aser Kashmir nunga tentetogo. NSCN-IM züngsem 4000-5000 shi ka alitsü aser India sorkari parnok taküm liyonga aotsü atema lenmang ka lapoktsütsüla” ta Pillai-isa ashi.