Hornbill benjong mapang

Taküm 2017 küma December ka nungi tenzüka anogo ter amongtsü asoshi Hornbill Festival sentong metetdaktsüogo. Taküm küm iba benjongmong sentong nung temelenshi kaji kentenba sentong Dimapur nung akatsü aser benjong amongdak Kisama nung polythene bag (plastic) kenyongi mamshitsü. Tang tashi nung alimai Nagaland meteta akümba mapa tongtibang ana rongnung kaji, Naga yimten nüchiso asoshi raraba aser kaji tanü putu nung Hornbill festival amongba ajanga asütsü. Naga nungersa süaka kin paikaya aser kin shia oshi balala, ano kin karbo kasa kin kübok yimtsüng shia oshi balala jembiba kintema lir. Ajisüaka, Naga kin ta asüba agi oshi ka ama kümer, Naga kin ajak tesem ka nung adenshia benjong amongtsü apitetba mapa ya tajangzük akaba mapa ka lir. Ibayongji, küm shia tajungba aser tuluba amonger. Atangji, Naga nungertem yimten nüchiso asoshi raraba ajanga alimai metetba dang nungibo Hornbill banjong amongba ajanga alimai metetba yasa tajungba aser tajangzük tuluba angur. Aji oda, taküm küm a iba benjong nung arua adentsü asoshi India nungi dang masü saka bendang lima tesem balala nungi ralirwalir aika jelia sentong renemer ataa alitsü. Item jagi bener aruba rongsentemji asen lima nung toktsür aotsü aser asen otsü-ang parnoki bener aotsü. Item ajakji asenoki rajema asen otsüji tajung asütsüsa nisung shiai sobaliba tajung sayua mapa ajak nung awashi metettsüla aser government-ia asen lima nung bendangertem arua jangratema amongtsüsa lenmang kanga topur junga yanglutsüla, nisung alidak ajak nung kidang kilong nung dang masü saka yimdong nung dena anüngdang amai street light alitsüla. Joko, Hornbill benjong atongtsü hopta asem dang lir. Ajisüaka, bendanglen nungi arur tama anenzüdak Dimapur yimti yimdong agi asenok ajak nümamedangtettsüsaba tia nung lir. Ano, taaktsü kaji, Dimapur nung tayimtsü anendak anepalur a mali ama arem, lishi aser auyi agi sünger angudang, tangari asenokji kanga nüma repranga alitsü südi ta akseta bilemer. Tayimtsü anendak nungi jagi adoker Dimapur aser Kohima lenmang  nung tarok-tapa ajak ajangdanga senzüdang, tangari asenok ya nübortem meima ochishia inyakba kin asü mesüra pei agitsü dang bilema inyakba nübortemar reprangteta adoker. Benjong tulu ayongzüka yur tangar alima kinük pezüsülen nungi jaoka ayu saka asenokbo lenmanga meyanglutet ta lira, asenok tajangzük angutsü asoshi masü saka tangar tsüngdang mak asütsüba benjong ayongzüker asütsü. Tang yabo joko Nagaland nung akaba gari lenmang aser light tesangwa agibo tangar state-tem dang nungi tajungba kümer alitsüla. Shitakba agibo, hornbill benjong ya Kohima (Kisama) nung dang masü saka Nagaland district headquaters aser sub-division ajak nung alitsüla.  Iba jagi dang Nagaland ajunga nung yartsüsang, kenten menü, chiyongtsü aser oset tapu balala yanglua ayokba sobalibatem asentenshitsü. Aji oda, kodang Nagaland ajunga nung mongdir, bendanglen nungi arur raliwalirtema Nagaland nung yimtsüng aser town balala nung anogo aika agia hornbill benjong amongbaji repranga senzütsü. Tangbo, Kohima nung dang amongerji raliwalirtem anogo ka ana mongerbo tereprangtsü tasen kecha maka alaker. Ano, lisopurtema Kohima nung alirtem kar dang ashi, tangarbo anogo ternü amongba benjong nung tajangzük kecha mangur. Itemji ano ken jungjunga bilemdanger, Nagaland Horbill Tourists Map nung Kohima nungi Tuensang, Kiphire aser Longleng, Mon tashi longa senzütsüsa sentongtem yanglutet nungbo, Nagaland-i arua langa raliwalirtemji pelateptsü aser tajangzük angutsü. Kodang raliwalirtem telok telok Nagaland ajak sema senzütsü tenzükdir tesem balala nung lendang semtu yanglur yangji nisung karibo khen nung nisung noklang junga mener chiyongtettsüsa hotel tajung yanglutsü, kari tourist bus aser taxi amshitsü aser karbo raliwalirtemtem anir senzür Guide akümtsü. Itemji khen asenoki jungjunga bilemdangra, Nagaland tasenba akümtsüba shisatsü aser sentongji yangjia karbo angutsü.