Hurricane Irma ajanga nisung 10 taküm samatsüogo

San Juan, September 07 (Agencies): Hurricane Irma yipru tesashi ya Brehostibarnü northern Caribbean nung kongshia ki aika raksatsü, süngdong aika tera mükepa atsütettsüba den külemi lenmang aika raksaja nisung ter taküm samatsü aser nisung meyirijang aika talidak me maka kümogo aser iba yipru tesashi ya Florida nunga kongshitsü südi, ta ashir.

Atlantic Ocean nung yipru tesashitiba, Irma ya Brehostibar anepdang tashi tera ajem saka Category 5 yipru indang tashi nungsa lir aser mopung tekera ya ghonda ka nung kilometre 285 tashi lir, ta US National Hurricane Center-i ashi.

Nisung aika aliba South Florida tesem nung iba yipru tesashi ya Deobarnü adongtsü südi, ta ashir aser iba ajanga angh-i emergency sangdongogo aser ketdangsertemi Miami metro aser Florida Keys tesemtem nungi nüburtem ajunga ainshitsü metetdaktsü. Iba yipru ya Atlantic tzüküm nung aliba Florida ajunga kongshitsü aser Georgia aser South Carolina tsütsüi aotsü, ta tsüngsang mopung takzürtemi ashi.

“Ibai yipru ya US otsü nung tesashitiba asütsü aser hopta ana tejaklen adalokba den tera mesüktepa lir,” ta University of Miami nung hurricane researcher, Brain McNoldy-i Hurrican Harvey den atishitepa ashi.

Caribbean nung France nunger indang litsü, San Juan nung iba yoipru agi taküm samatsür parnok ti aser yirur 23 lir aser anu Saint-Martin aser Saint-Barthelemy tesemtem nung tesama tuluba alitsü saka iba tesemtem nung rescue team-i tang mita aoba mapang lir, ta French Interior Minister, Gerard Collomb-i ashi.

Iba asetkongi ‘food rations’ 100,000 yokogo, ta Collomb-i osangbener den jembidang ashi.

“Ibai takoksa tulu lir, asenkong anaprong tanaben yanglushitsüla. Kaket reju timba raksaogo,” ta pai ashi.

Item asetkong nung tsüngsang junga akümba sülen France Tir, Emmanuel Macron-i semdangtsü, ta tir indang office ajanga ashi.

Iba yipru ajanga United Kingdom indang litsü, Anguilla nunga kongshi. Irma yipru ajanga British Virgin Island nunga teraksa aludaktsüogo, ta Foreign Office Minister, Alan Duncan-i ashi.

Iba yipru tesashi ajanga Puerto Rico nung kongshi aser US nunger indang litsü nung mopung tesashi aonba den tzünglu tesashi aru aser Brehostibar anepdang Dominican Republic aser Haiti tsütsüleni ao.

Anüdoklen Caribbean asetkong tilatem nunga iba yipru mopung ghonda ka nung kilometre 298 tashi aon aser ketdangsertemi teyari agütsütsü asoshi tasak kümdaktsü.

Barbuda nunga iba yipru tiyongtsü agi Bodhbarnü ajanga süyi. Iba linük nung ki 1,400 shi aliba nungi shilem 60 meshimeshia raksatsü, ta Antigua aser Barbuda Ato Kelonser, Gaston Browne-i osangbener dang ashi.

“Tensa kanga majung nung lir,” ta Browne-i tayimtsü nung kidanger asetkong semdanga jajar aruba sülen Antigua nung ashi.

Telecommunication system ajunga raksatsüogo aser iba ya yanglutsü asoshi küm junga agitsü. Iba yipru nungi jena aodang arishi küm 2 tain tka asü, ta Browne-i ashi.

Anguilla asetkong nunga nisung ka iba yipru ajanga asüba angashiogo aser iba tesem nung ketdangsertemi ashiba agi, airport, hospital, nisungtem jenokdak ki aser kaket reju raksatsüba den külemi lenmang shilem 90 nung nisung senzütsü mokoki kümogo, ta Caribbean Disaster Emergency Management Agency ajanga ashi.

Puerto Rico asetkong tesadang nung electricity mala aser nisung 900,000 tamang tia nung lir aser nisung 50,000 asoshi tzü mali, ta iba tesem nung ketdangsertemi ashi.

U.S Virgin Islands aser Puerto Rico nung teyari agütsütsü asoshi US Tir, Donald Trump-i item tesem nung emergency sangdongba agizükogo.