Hurricane Maria ajanga Puerto Rico nung nisung 13 taküm samatsü

San Juan, September 22 (Agencies): Puerto Rico asetkong nung yipru tesashi Hurricane Maria ajanga kiojen raksatsüba sülen Hokulbarnü tzü metsüng adoka nisung 13 taküm samatsü aser ketdangsertemi nisung 700 jungnüa lendong nungi kümzük.
US nunger indang Puerto Rico asetkong nung Hurricane Maria ajanga electricity aser telecommunication ajunga raksatsüba sülen iba yipru ya tang putu nung tesashitiba lir, ta Puerto Rico angh, Ricardo Rossello-i ashi.
“Asetkong tesadang ka nung osang ola agiteptsü mali asünungji tang tashi nung iba tzümetsüng aser yipru lendong nung asür 13 dang jangja lir,” ta angh-i osangbener dang Hokulbarnü ashi.
“Hurricane yipru süyir ghonda 24 jungogo aser nisung ajak kümzüktsü asoshi onoki akokba tashinung maparen balala inyaker. Tang tashi nung onoki nisung 700 kümzüka lir,” ta pai ashi.
Puerto Rico tesem kar nungbo Hurricane Maria ajanga tzünglu inch 40 (meter ka dang tali) bener aru aser Rossello-i anentsü alutsü südi, ta ashi.
“Tesem aika nung tzümetsüng lir, ki aika raksatsüba osang arua lir. Aser tang tashi tzünglu aruba manener,” ta Ricardo-i ashi.
Hurricane Maria ajanga Dominica nung nisung 15 taküm samatsü, Haiti nung asem aser Guadeloupe nung ana asü.
“Puerto Rico kanga mejungi raksatsüogo. Tensa kanga sa majung nung lir,” ta US tir Doland Trump-i Brehostibarnü osangbener dang ashi. Iba asetkong nung nütsüng million 3.4 lir.